Home Hudicial Homber clave den traficacion di droga pa Merca no kier papia

Homber clave den traficacion di droga pa Merca no kier papia

352
0
SHARE
- Advertisement -

Door di menaza cu lo mata su señora si e menciona nomber

ORANJESTAD (AAN): Recien den Corte di Husticia a trata un interesante caso di transportacion di droga pa Merca. E interesante di e caso tabata cu tres persona ta envolvi y esun clave den henter e traficacion aki, un Venezolano, a haya menaza cu si e papia, nan lo mata su señora na Venezuela. Hopi biaha den Corte di Husticia, sospechosonan ta bisa Hues cu nan a wordo menaza pero no sa tene cuenta cu esaki.

E homber Arubiano J.C. y e hombernan Venezolano, I.T. biba na Aruba y J.H. biba na Venezuela a presenta dilanti Hues pa e caso penal cu Ministerio Publico a cuminsa contra nan. E trio aki ta wordo acusa di a exporta cocaina riba 20 Augustus 2019. I.T. tambe ta wordo acusa di ta complice door di a haci e preparacionnan y contactonan.

   DROGA SCONDI DEN BOTER:

Hues a puntra J.C. si el a viaha cu cocaina den maleta. El a admiti esey. Hues a bisa cu J.C. a wordo priminti 10 mil dollar pa hiba droga Merca. Dos homber lo a duna J.C. boternan conteniendo cocaina. En total mas cu 3 kilo di cocaina a haya den e boternan.

Segun J.C. el a wordo bisa cu ta 1 kilo tabatin total. El a bisa cu ta dos hende di Sur America a acerk’e y na Merca e lo wordo busca.

   VIGILA MULA DI DROGA:

Hues a mustra cu I.T. tabata riba e mesun vuelo cu J.C. pa bay Merca. Segun I.T. el a haya pasashi for di J.H. di regalo pasobra el a haci aña pa bay Merca y vigila J.C. durante e vuelo pa Merca. Hues a puntr’e pakico e mester a vigila J.C. El a bisa cu e no tin idea. El a bisa Hues cu el a bay pa pasa vacacion y no sa kico tabata pasando.

Hues a mustra cu investigacion ta mustra cu J.H., a wordo pidi pa bay pero e no tabatin visa. E ora ey el a pidi I.T. kende si tabatin visa. Segun I.T. e no tabata sa kico tabata pasando. E no a pensa cu e viahamento tin algo di haci cu droga. Ta asina cu Polis a haya potret di J.C. den e cellular di I.T.

    MENAZA DI TRAFICANTE DI DROGA:

J.H. a declara cu el a wordo acerca pa un Arubiano pa hiba droga. Nan lo pag’e 2 mil dollar pa e vigila un mula cu lo hiba droga Merca. Door cu e no tin visa Americano, el a pidi I.T. pa haci’e p’e. El a haya e potret di J.C. y a manda I.T. esaki. Segun J.H. e tabata sa cu ta droga pero no sa e cantidad di droga. J.H. a bisa cu su señora na Venezuela a wordo menaza cu si J.H. menciona nomber di e persona cu a acerca, lo mata su señora. Ta asina cu e señora a bin Aruba pa informa J.H. esaki den KIA. Esey ta motibo cu e no ta papia.

Ta asina cu J.C. a wordo condena den pasado pa atraco cu violencia.

   EXIGENCIA DI FISCAL:

Fiscal a bisa cu e ta haya legalmente proba e acusacion contra e trio aki. Fiscal a mustra cu ta algo mas cu 3 kilo di cocaina J.C. tabatin den su maleta. El a kere cu ta menos droga tabatin. I.T. a bisa cu el a haya un ticket y mester a vigila J.C. y un dama. El a bisa cu e lo haya 2 mil dollar pa vigila. J.H. promer no kier a bisa nada pero despues a papia.

J.H. tabata sa di e droga y cu ta J.C. lo hiba e droga. J.H. tabata esun di contacto den e grupo. E tabatin contacto cu esnan tras di e droga. Haya cu hunto nan a transporta droga. Fiscal a exigi pa J.C. 24 luna di prison di cual 8 luna ta condicional cu 2 aña di prueba. Pa I.T., Fiscal a exigi 12 luna di prison di cual 4 luna ta condicional cu un temp di prueba di 2 aña. Pa J.H. Fiscal a exigi 24 luna di prison di cual 8 luna ta condicional cu un tempo di prueba di 2 aña.

    CASTIGO:

Despues di defensa di abogadonan, Hues a sera tratamento di e caso y a dicta sentencia di biaha. Hues ta haya J.C. culpable di exporta cocaina y a conden’e menos cu Fiscala exigi. Hues a tene na cuenta cu J.C. ta first offender pa droga. Hues a condena J.C. na 24 luna di prison di cual 12 luna ta condicional cu 2 aña di prueba. Tambe Hues a ordena pa destrui e cocaina.

Hues a bisa cu e no ta haya I.T. culpable di exporta pero si subsidiario complice di exporta cocaina entre 13 y 20 Augustus 2019. Esaki door cu I.T. tabatin contacto cu J.H. pa cu vigila J.C.     Hues a condena I.T. na 12 luna di prison di cual 4 luna ta condicional cu 2 aña di prueba. Hues a bisa cu e cellular di I.T. ta keda confisca y e placa confisca mester debolbe.

Pa loke ta J.H., Hues ta considera J.H. complice di exporta. Na opinion di Hues, esey no ta haci J.H. su rol mas cu I.T. Pesey Hues a condena J.H. na 12 luna di prison di cual 4 luna ta condicional cu 2 aña di prueba. E cellular di J.H. lo keda confisca pero e placa si mester debolbe.

 

- Advertisement -

DUNA COMENTARIO

Please enter your comment!
Please enter your name here