Home Religion y Espiritualidad Hesus, bo conoce nos dolor!

Hesus, bo conoce nos dolor!

52
0
SHARE
- Advertisement -

Hesus. nos Amigo, nos Salbador y nos Dios.

Ta pa e momentonan manera nos conoce awe,

Bo a bini mundo y entrega nos e berdad di nos Dios.

Bo a bira hende mescos cu nos.

Bo solidaridad cu nos a haci posibel pa Bo sufri.

Bo pasion a bira e Misericordia di Dios pa hende.

Nos a drenta e siman den cual nos ta observa,

e prijs cu Abo a paga pa cada fayo cu nos comete.

Bo conoce nos dolor, Hesus.

Bo a pasa den e dolor di wordo condena na morto.

Nos a faya cu bo gran mensahe, nos bon Hesus.

E poder cu Tata a permiti ciencia entrega nos,

nos a maluza pa nos por a haya poder egoista.

Nos tabata canta “Hosana, Yiu di David”.

Un rato despues nos tabata crucifica Bo na abandono.

Placa, placer, poder a kita nos bista for di Bo.

Awe final di Cuaresma ta topa cu nos den cuarentena.

Un enemigo cu nos no por mira, kier destrui hende.

E Creacion perfecto di Tata ora Spirito Santo a move,

ta wordo destrui pa loke nos no por cambia.

Semana Santa ta recorda nos cu Bo conoce nos pena.

Bandona pa tur hende, bo a pasa un anochi den hofi.

Isola di tur hende cu a bira lomba pa Bo, bo a resa.

Bo a pidi Tata kita Bo dolor pero a acepta Su boluntad.

Hesus, solidario cu e ser humano cu Bo a salba,

awe nos ta entrega Bo nos dolor y pena.

Pidi Tata pordona nos pasobra nos no sa kico nos a haci.

Bo a cumpra nos liber Hesus di tur sufrimento y dolor.

Siña nos pa awe den Bo Santo Nomber,

bira digno di e Misericordia grandi di nos Tata.

Sanger y awa tabata bo sodo den Hofi di Oleifi.

Bo conoce nos dolor, Hesus.

Manda Bo Spirito Santo pa renoba nos mundo.

Haci Semana Santa bira e momento di cambio pa nos,

pa asina nos bida bira e paraiso di husticia y paz,

di amor, compasion,  cu ta haci nos Bo ruman.

 

 

- Advertisement -

DUNA COMENTARIO

Please enter your comment!
Please enter your name here