Home Salud Hendenan muher tin mihor defensa contra Coronavirus cu hende homber

Hendenan muher tin mihor defensa contra Coronavirus cu hende homber

112
0
SHARE
- Advertisement -

ORANJESTAD (AAN): Diadomingo durante e conferencia di prensa di 2’or di tur dia, un video interesante a wordo pasa, pa duna un splicacion bastante amplio riba e Coronavirus.

Den e video aki di Universiteit van Nederland prof. dr.Huub Savelkoul a splica entre otro cu ora cu bo man mishi un caminda cu tin e virus y bo pone bo man na  bo nanishi, mitad di e celnan di bo nanishi dentro di un dia ta infecta cu e virus.

E virus ta bay reproduci su mes rapidamente y ora cu bo tosa of niester, e virus ta plama rond masha lihe mes.  Bo curpa sinembargo rapidamente ta ripara cu algo ta robez y dentro di algun minuut ta activa e prome linea di defensa, cu ta wordo yama ‘natural killer cells’.

E linea di defensa aki ta limita si y door di esey nan ta pidi asistencia door di saca asina yama cytokines y esakinan ta pone cu celnan di e di dos linea di defensa ta wordo alerta. Sinembargo, ta dura entre 3 cu 4 dia prome cu e celnan aki drenta den accion.

Mientrastanto, e virus ta sigui multiplica den bo curpa. E profesor a splica cu e di dos linea di defensa ta consisti di asina yama ‘killer T-cellen’, cu ta celnan cu specificamente por detecta celnan cu ta infecta cu virus y incapacita esakinan.

Prome cu esaki asina yama ‘helper T-cellen’ mester wordo activa’. Ora cu esakinan wordo activa, e killer T-cellen ta bay multiplica nan mes.

Remarcablemente e killer T-cellen ta multiplica nan mes mas frecuentemente cerca hende muher, compara cu cerca hende homber.  Door di esaki hendenan muher tin un ehercito mas grandi di defensa contra infeccionnan di virus, compara cu hende homber.

Coronavirus ta un virus sabi si y un problema cu tin ta cu te hasta ora cu e virus a desaparece for di e curpa humano, e killer T-cellen no ta haya un señal mas pa stop.

E celnan aki ta sigui y ta ataca bo celnan saludable tambe y door di esaki bo pulmonnan ta ricibi daño. Door di e reaccion di e infeccion tin mas likido ta drenta bo pulmonnan y ta bira mas dificil pa bo hala rosea.

Ta manera cu bo ta wordo menaza di hoga door di e likido den bo pulmonnan.  Door cu e celnan no ta haya un señal di stop, nan lo sigui produci cytokine y  door di esaki tin un cantidad grandi di cytokine den bo sanger(cytokine storm) y a consecuencia di esaki otro organonan manera bo higra, bo riñonan y bo cerebro por cay afo.

Hendenan cu ta di edad halto y/of tin un salud zwak por fayece. No solamente a consecuencia di e inrfeccion di virus, sino mas ainda door di un sistema imunologico demasiado activo.

Muchanan practicamente no ta produci un tormenta di cytokine y pesey por lo general nan lo no muri door di e virus aki.

Hendenan hoben y sano tambe tin suficiente capacidad den nan curpa pa temporalmente desactiva e killer T-cellen y asina preveni un cytokine storm.

E hendenan aki ta bira bon bek y e celnan den nan curpa tin un memoria riba con pa combati e virus y door di esaki nan ta bira immune. Si bo a haya e virus y bo a recupera, bo ta bay ta immune pa algun tempo.

Si bo tin hopi di e hendenan immune ta cana rond, alrededor di 60%, bo tin locual ta wordo yama immunidad di grupo y asina bo por para plamamento di e virus. Sinembargo, e pregunta ta keda con largo un persona ta keda immune.

Ta wordo calcula cu un persona ta keda immune entre 6 cu 12 luna. E virus por keda cambia si y pesey ta hopi importante pa haya un bon vacuna pa por derota e virus.

E vacuna mester preveni cu e virus por penetra den celnan di bo curpa y asina ta causa enfermedad. Pesey rond mundo e deseo grandi ta pa un vacuna asina bira disponibel pronto.

- Advertisement -

DUNA COMENTARIO

Please enter your comment!
Please enter your name here