Home Religion y Espiritualidad “Esaki ta Mi curpa entrega pa boso”

“Esaki ta Mi curpa entrega pa boso”

51
0
SHARE
- Advertisement -

Na 2020 Tata, na un forma cu nunca nos por a spera,

bo a kita nos for di beach, di placer den Semana Santa.

Bo a permiti pa nos a wordo confronta cu un plaga,

den crisis grandi cu ya Aruba tabata conoce.

Bo a stop nos careda den bida y nos cayanan ta bashi.

Bo a isola nos den casnan, caminda nos mester topa mes.

Tabata Bo deseo Tata pa durante e Semana Santa aki,

mundo busca Bo atrobe y mundo para keto na Bo Amor.

Awe nos mester di Bo pa nos wordo renoba.

Nos mester di Bo Spirito Santo pa realisa e prijs,

cu casi 2000 aña pasa, Hesus a paga  pa pordon di nos pica.

Awe Tata, Bo a permiti e plaga cera portanan di Misa

caminda nos tabata bay renoba e Sacrificio di Hesus.

Bo a transforma nos casnan den Iglesia di nos famia,

y  tecnica moderno ta uni nos cu nos famia rond mundo

pa hunto hinca rudia pa ofrece Curpa y Sanger di Hesus.

Bo a prepara e posibilidad pa ora plaga tene nos na cas,

den nos cas nos celebra e Aliansa Nobo entre Bo y hende.

Awe nos kier pidi Bo Tata, laga Bo Spirito Santo move,

mientras den nos cas nos ta sclama “Mi Señor y Mi Dios”.

Laga e Aliansa Nobo proclama riba altar trece Bo Amor.

Duna nos, Bo Pueblo, sanacion, paz confiansa, fe,

pa nos por pasa lama cora y drenta un mundo transforma.

Nos ta entrega Bo e Curpa y Sanger di Cristo pa nos entrega.

Nos ta entrega Bo e unico Sacrificio cu nos pordon.

Nos ta entrega Bo Tata e señal di Bo Misericordia,

E Curpa y Sanger di Hesus, Su Morto na Cruz.

Permiti pa den e Semana Santa aki, nos bira hende nobo,

cu boluntariamente ta busca silencio y ta busca isolacion,

durante momentonan sagrado di nos union cu Bo.

 

- Advertisement -

DUNA COMENTARIO

Please enter your comment!
Please enter your name here