Home Editorial E nubia scur di cien caso di COVID-19 na un paraiso

E nubia scur di cien caso di COVID-19 na un paraiso

306
0
SHARE
- Advertisement -

Editorial 

Aruba ta un paraiso. Dilanti costa di continente, un isla a wordo crea como cas di un pueblo cu historia a reuni.

Aruba Dushi Tera ta tres palabra cu a marca historia di e isla, cu nos Creador a bendiciona cu un clima agradabel sin peliger grandi pa calamidad natural. E bunitesa di Aruba a atrae bishitantenan, cu despues di tempo a bira industria di turismo como parti di nos economia.

2020 mester a bira un aña di cambio pa Aruba, cu ta den necesidad di soluciona su crisis financiero y economico. For di 2019 e pais a discuti e varios pasonan pa eleva e nivel di bida a base di sosten na e fundeshi comercial, riba cual economia ta basa.

Mientras mundo tabata traha riba un recuperacion economico pa 2020, cu riba papel tabata e posibilidad pa e aña aki, un calamidad mundial a haci su entrada y awe Aruba mester wordo transforma como un ehercito cu ta lucha contra e coronavirus nobo.

DIARIO, vigilante di e bienestar di Aruba, tabata tin e tarea pa prepara Aruba pa e realidad di e malesa cu a haya nomber di COVID-19. No tabata facil prepara Aruba pa e realidad duro cu tabata sconde na horizonte di e pais.

For di momento cu e malesa a bira noticia, expertonan a yuda DIARIO prepara Aruba no solamente pa un malesa cu necesidad di expansion di nos cuido medico, pero tambe pa prepara pa e caida total di nos comunidad si e coronavirus nobo logra drenta.

Gabinete Wever-Croes a tuma medidanan necesario pa tempo pa cera porta pa e malesa. E unico medida pa evita un desastre pa salud di hende, tabata pa cera porta di Aruba loke a nifica tambe cera porta pa economia y comercio cu ta dicidi pa nos bida social.

Aruba a hiba un gran sacrificio y gobierno a traha riba plannan di emergencia cu a percura pa un estado di guera di Aruba contra un enfermedad peligroso pa su naturalesa contra hende cu ainda no tin arma pa bringa.

Awe un nubia scur ta riba Aruba, cu manera DIARIO a adverti un siman pasa, a registra Cien caso di COVID-19, cu ya a ocasiona dos morto.

E cifra aki ta un veredicto pa bienestar di Aruba. Mientras e cantidad di caso ta sigui subi, Aruba no por bolbe normal.

Esaki ta nifica cu nivel di bida na e paraiso ta basha abou y cu medidanan di gobierno mester skirbi un orden nobo pa nos comunidad por funciona mientras e no por regresa na normalidad.

DIARIO, como matutino di Aruba kier bati na porta di e consenshi comun di ciudadanonan pa pidi cooperacion pa por frena paso di COVID-19, enemigo di nos paraiso, nos Aruba Dushi Tera.

Ban coopera cu e reglanan di gobierno, pa nos economia por wordo activa pa asina nos por sigura nos pan di cada dia, cu hunto cu un bon salud, ta e base di felicidad.

- Advertisement -

DUNA COMENTARIO

Please enter your comment!
Please enter your name here