Home Editorial E luz di Semana Santa 2020 pa un mundo confuso

E luz di Semana Santa 2020 pa un mundo confuso

101
0
SHARE
- Advertisement -

Editorial  

Hopi tempo pasa, entrada den Semana Santa tabata nifica pa pueblo di Aruba, culminacion di e temporada sobrio di Cuaresma.

Tradicion di Cuaresma tabata pone un fin na fiesta, luho, recrea excesivo y tabata invita hende pa isola di e loke mundo por a ofrece, recupera balornan cu por tabata na peliger.

Den seno familiar, un temporada di fortificacion di e ser humano tabata desaroya na un forma special.

Delicia pa boca no tabata subi mesa durante cuarenta dia. Tabata siña muchanan disciplina pa pone nan bida den balansa pero tambe pa comparti pa yegando na e celebracion di Pasco, mucha y adulto, duna asistencia na pobernan cu placa cu tabata spaar cu sacrificionan personal manera no huma, no tene fiesta, no abusa di cuminda.

Cu tempo e tradicionnan a bay perdi y den esaki tambe balornan importante den nos comunidad local y mundial a perde tereno contra modernismo.

Aruba a importa pensamento cu a cambia cierto aspectonan den comunidad hunto cu e era moderno internacional.

Semana Santa a bira un siman importante pa ricibi turista y tene actividadnan relaciona cu turismo.  Aunke e Arubano ta conoci como un pueblo cu no ta bandona su fe, Semana Santa a haya como un punto central campamento, recreo y cambionan grandi den e forma cu ta observa Cuaresma.

Durante ultimo añanan, casonan importante a pone comunidad puntra su mes, kico a pasa cu hende. Na diferente ocasion Aruba tabata den shock pa crimennan horibel, caso di abuso, desaroyonan cu no tabata parce di por ta tuma luga na Aruba.

Na 2020 Cuaresma, sin cu ningun hende na mundo por a planifica esaki, a haya un buelta inespera. Hende isola den su cas, famianan den panico, comunidad paralisa pa Covid-19, hunto ta wordo confronta cu e necesidad pa mira su mes y busca puntonan di sosten pa por enfrenta e realidad amarga y mira un futuro nobo.

Cuaresma 2020 ta cera cu mayornan na cas cu nan yiunan, cu awor tin tempo pa otro y ta cera conoci completamente cu otro.

Cuaresma 2020 ta cera cu famianan cu tin atencion pa otro.

COVID-19 a cera porta di salon di fiesta. Beachnan ta bashi. Hende no por subi caya pa bay fiesta. Un silencio ta reina.

Na porta di casnan tin takinan di palma, pasobra hasta porta di Misa ta cera,

hende ta wordo forsa pa confronta su mes. Comunidad ta wordo forsa pa para keto, hisa cara na laira en busca di un horizonte nobo, un renacemento y un resureccion.

Awe DIARIO ta invita Aruba pa nos bolbe na e herencia cu nos a ricibi di e generacion di grandinan, cu den nan isolacion tin nan bista fiha riba nos Creador y e mensahe di speransa di Semana Santa cu ta termina cu victoria riba dolor.

 

- Advertisement -

DUNA COMENTARIO

Please enter your comment!
Please enter your name here