Home Salud Desde dialuna 6 di April tin un Hotline Nacional pa Salud Mental

Desde dialuna 6 di April tin un Hotline Nacional pa Salud Mental

62
0
SHARE
- Advertisement -

Enid de Kort di DAS: Pa sigui yuda e cerebro keda stabiel y balansa

ORANJESTAD (AAN): Enid de Kort, Terapista di Famia y Pareha na Departamento di Asunto Social a elabora durante e conferencia di prensa relaciona cu e ultimo informacionnan rond di Coronavirus algun aspecto importante pa tene cuenta cune.

El a indica cu e cerebro tin cierto custumber y rutinanan. Den un frega di wowo tur cos a cambia y “nos cerebro actualmente ta den un shock y e mester adapta na un situacion nobo”, a splica.

Hopi hende den e situacion aki ta haya ansiedad, miedo, preocupacion y hasta desesperacion. Otronan por drenta den panico. Tur esaki por tin consecuencia riba e bida diario y tambe riba e relacionnan familiar, de Kort a señala.

Banda di esaki tambe tin tur e medidanan di prevencion manera distancia social , cuarentena, isolacion, toque de queda, shelter in place. Tur esakinan tin influencia riba bida diario y e contactonan social, a agrega.

“Nos cerebro ta florece cu contactonan social . Pero awor, fisicamente, den hopi caso e no ta posibel mas”, a indica.

Pa sigui yuda e cerebro keda stabiel y balansa mester busca otro formanan pa contacto social pa por keda activo. Por haci esaki na diferente manera: yama otro, manda mensahenan, papia cu bisiñanan for di cura pa cura teniendo cuenta cu distancia social, por cana den mondi y asina por haci ehercicio cu tog ta mantene e cerebro activo, a remarca.

Pa esnan den isolacion y cuarentena, cu no por sali, tambe ta bon pa purba desaroya e creatividad. Por wak pelicula, por lesa, pinta, skirbi, busca webinarnan pa desaroya bo mes y tambe por busca programanan online pa wak.

“No laga miedo crece mas grandi cu bo fe. E realidad ta cu cambio por duna nos miedo, pero pa nos por sigui crece y progresa nos mester por siña maneha y surpasa e miedo aki”, Enid de Kort a manifesta.

Si un persona ta desea un oido pa haya sosten y conseho den esaki a crea un infrastructura pa por ofrece esaki. Desde dialuna 6 di April lo tin un hotline nacional pa salud mental na e number 281-0909. E oranan di atencion ta 2 pm pa 10 pm.

E hotline aki ta wordo dirigi pa psicologonan y terapistanan di Departamento di Asunto Social den cooperacion cu Centro Multidisciplinario y tambe cu algun personal di Respaldo, a subraya.

- Advertisement -

DUNA COMENTARIO

Please enter your comment!
Please enter your name here