Covid-19 lo afecta cartera di tur ciudadano!

    770
    0
    SHARE
    - Advertisement -

    Advertencianan di DIARIO awor ta bira realidad

    *Publico mester reduci gastonan y evita debe pa futuro

    *Covid-19 ta dal paisnan di origen importacion Aruba

    ORANJESTAD(AAN)–Uno di e advertencianan di DIARIO na Januari ora e coronavirus nobo a bati na porta tabata, cu ciudadanonan di Aruba mester cuminsa baha gastonan pasobra e virus nobo lo a causa un scarsedad mundial serio.

    Investigacionnan di DIARIO y combersacionnan cu informantenan importante ta mustra, cu ciudadanonan na Aruba mester tene na consideracion cu mundialmente prijsnan ta bay subi awor debi na scarsedad a base di e problemanan actual pa produci articulonan cu Aruba ta importa.

    Covid-19 tin un impacto enorme riba e cantidad di empresa cu mester a cera nan porta pasobra nan no por continua cu nan produccion.

    Un cantidad record di personal mundialmente ya mester a bay cas pasobra companianan no por sigui cu nan produccion cu ta sostene nan empresa.

    Covid-19 na e momentonan aki no solamente ta gasto grandi pa Aruba cu mester tuma medida evita un problema serio cu su institutonan oficial.

    Loke ta pasa na Aruba ta pasa na henter mundo, caminda e medidanan pa stop avance di Covid-19 ta urgi medidanan serio den cual gobiernonan mescos cu na Aruba mester sostene trahadonan sin trabou.

    Fabricanan cu mester exporta articulonan pa Aruba ta paralisa. Companianan grandi cu mester percura pa realisacion di e comercio internacional, ta paralisa.

    Mundo ta paralisa, manera expertonan a splica.

    E resultado directo ta un scarsedad enorme cu ya por sinti riba diferente tereno.

    Banda di esaki mester tuma medida pa garantisa cu e pais por sigui dilanti. Mester spera cu diferente servicio lo bira mas caro pasobra nan produccion a bira mas caro.

    Companianan na Aruba no tin entrada cu nan porta cera. Companianan den exterior tampoco loke ta afecta companianan madre den exterior cu no por mantene nan companianan na Aruba.

    E situacion dramatico riba tereno financiero y economico pa cual DIARIO a adverti for di un principio a base di cifranan mundial di entre otro IMF y instancianan oficial di comercio mundial, a bira realidad.

    Publico mester baha gasto y placa cu e no ta gasta na entre otro recreo cu a bira imposibel mester wordo warda pasobra e luganan cu a cera mester wordo yuda cu placa di fondo publico di Aruba, cu ta nifica comunidad manera ta e caso rond mundo.

    DIARIO lo sigui informa pueblo cu informacion concreto!

    - Advertisement -

    DUNA COMENTARIO

    Please enter your comment!
    Please enter your name here