Home Religion y Espiritualidad Catoliconan ta preparando pa un Siman Santo virtual

Catoliconan ta preparando pa un Siman Santo virtual

116
0
SHARE
- Advertisement -

ORANJESTAD (AAN): Ora cu e yamada a plama rond mundo pa tur hende keda den cas pa asina stop e brote di Coronavirus di sigui plama, diferente actividad cu Iglesia Catolico ta haci durante Cuaresma a wordo suspendi.  Na diferente ocasion DIARIO mes a publica en extenso e mensahe di Obispo Mgr. Secco for di Bisdom Willemstad.

Esaki ta net e temporada cu Iglesia Catolico tin hopi actividad pa cuaresma, y for di Vaticano mes a bin e orden pa stop esaki.  Net e fechanan unda Cristiannan ta conmemora e cuarenta dianan di Hesus den desierto.

Catoliconan di tur pais a haya nan mes obliga na participa den diferente Caminda di Cruz, Retiro, Eucaristia, y demas actividad religioso via di medionan di comunicacion y tambe social media.

Ainda por corda ora cu tur hende a mira e bendicion historico “Urbi et Orbi” manda pa henter mundo for di Papa Francisco, for di un plaza di San Pedro di Vaticano totalmente bashi dia 27 di Maart cu a pasa.

Diadomingo di Rama awor, ta cuminza Siman Santo, y e lo no bay ta diferente pa e celebracionnan cu lo tene na Roma y rond mundo, specialmente Aruba.

Diadomingo di Rama ta duna inicio na e siman santo y e aña aki nos lo celebre na un manera sobrio. Mirando cu nos no por asisti na misa, mi ta pidi boso cada un como fiel Catolico di henter pueblo di Aruba demostra bo(so) compromiso y solidarismo cu Hesus sufriente y nos pueblo sufriente door di pone riba porta di bo cas, un rama of cruz traha di rama. Despues pone e imagen ey riba bo pagina di Facebook pa asina demostra bo comunion cu henter Iglesia. E idea aki ta wordo promovi tambe pa otro paisnan.

Laga nos dorna nos porta di cas cu e rama mescos cu e Israelitanan a marca nan porta di cas cu e sanger di e lamchi pa nan liberacion for di esclavitud.

Den momentonan aki laga nos implora riba Dios Su misericordia y pid’E pa libera Aruba di efectonan cu e virus ta trece, pa medio di e sanger cu Hesus a drama pa nos.

Pero ta claro cu tur Misanan rond mundo haci cambio na e actividadnan liturgico, unda ta conmemora e pasion, morto, y resureccion di Cristo.

DIARIO a tuma nota cu ya caba diferente Parokia a cuminza cu transmision di nan Misa via Social Media.  A nota cu Parokia Birgen di Fatima na Dakota tambe a prepara pa haci esaki, pa tur hende por sigui e celebracionnan.

Parokia San Francisco na Playa tambe lo bay ta transmiti misa riba Social Media, segun a ser informa.  Nan lo pasa tur Santa Misa cu bo por wak for di bo cas riba facebook.com/Parokia.SanFrancisco
Parokia Inmaculada Concepcion di Santa Cruz tambe tin instalacion profesional di video, pa transmiti misa.  DIARIO a compronde cu esakinan tambe lo ta visible tanto via DIARIO-TV como tambe Telearuba.

- Advertisement -

DUNA COMENTARIO

Please enter your comment!
Please enter your name here