Home General Arubiano: Aruba mester di bo!

Arubiano: Aruba mester di bo!

125
0
SHARE
- Advertisement -

Cifranan ta mustra cu awor nos mester lucha!

*Na un momento dramatico den su historia 

Ayera, Aruba a conoce otro aumento importante di e cantidad di casonan di Covid-19.  Cu aumento cu 7 caso mas, Aruba a yega na un total di 71 caso, cu riba un poblacion di Un Miyon Habitante ta nifica un total di 665 caso.

Nos ta haci e comparacion aki debi na e hecho cu e tamaño di Aruba y e cantidad di habitante, ta stroba hende mira con serio e situacion di Aruba ta den comparacion mundial.

E cantidad di caso ta sigui aumenta na mundo y awe e Arubiano mester yuda Aruba evita un calamidad increibel.

Gobierno di Aruba a cumpli cu su deber pa informa. A  cera economia pa scapa e salud di pueblo, cu awe mester dicidi pa su mes kico ta pasa.

Bida di agentenan policial, personal di cuido medico y tur cu mester sigui labora na bienestar di Aruba, ta directamente na peliger pa asina por sigui proteha comunidad.

Awe e Arubiano mester comprende cu Aruba mester di dje. Aruba mester di su cooperacion pa sobrevivi.

Kico mas mester analisa? E grafico cu ta mustra con e coronavirus ta plama rond mundo?

Cuanto palabra mas mester dedica na e peticion pa Arubianonan keda nan cas y isola nan mes pa evita malesa cu Aruba, mescos cu tur pais na mundo, no ta prepara pa enfrenta?

Bida di Arubianonan ta den man di Arubianonan cu semper a demostra nan lealtad na nan pais.

Ta cu e amor pa patria cu a inspira e Arubiano lucha pa Status Aparte, lucha pa Aruba ta un nomber respeta rond mundo, awe nos ta presenta e grafico di loke e coronavirus ta haci cu mundo.

Arubianonan, demostra amor pa boso pais. Laga nos resa pidi Dios duna nos asistencia y forsa.

Pero coopera. No pone mas hende, mas bida a riesgo.

Permiti pa den futuro, generacionnan por yama danki cu awe nos ta sacrifica nos libertad, nos goso, pa scapa nos pais y su hendenan.

Nos ta labora pa boso. Nos ta sigui entrega boso tur informacion.

Na nomber di tur cu a lucha pa e pais aki, ban pone un fin na e coronavirus cu yudansa di Dios, Kende nos ta pidi bolbe bendiciona Aruba cu Su proteccion!

- Advertisement -

DUNA COMENTARIO

Please enter your comment!
Please enter your name here