Home Hudicial Ainda falta 308 persona pa paga nan boet di Toque de Queda

Ainda falta 308 persona pa paga nan boet di Toque de Queda

241
0
SHARE
- Advertisement -

ORANJESTAD (AAN): Nan a gara bo riba caya durante Toque de Queda y bo a ricibi un boet di 1.000 Florin?  Corda bon cu bo tin solamente 2 siman di tempo pa paga esey.

Asina Fiscal mr. Yolanda Pronk a indica riba Diamars.  Y sorprendentemente ta djis un man yen di hende so a paga boet completo caba.

Te cu Diamars merdia, un total di 355 persona a wordo deteni y haya boet di 1.000 Florin pa viola e regla di Toque de Queda.

Di esaki, solamente 3,7% di nan ya a paga e boet completo.  Fiscal mr. Pronk a indica cu 13 hende ya a paga e 1.000 Florin full.

Tambe di e 355 persona, casi 9,6% a haci un areglo di pago, esta 34 persona.

Pero e resto, cu ta 86,7% falta ainda pa haci pago.  Esey ta un total di 308 hende cu ainda tin di saca placa, y nan tin 2 siman di tempo pa haci esey.

Ministerio Publico ta cera, pero bo por haci pago Online.  Riba e pagina di Facebook di Ministerio Publico tin un poster pa mustra con bo por haci e pago ey, of yama nan na telefon 521-4100.  Por email tambe na [email protected] pa mas detaye.

Si acaso bo no paga na tempo, bo caso lo bay Corte y tin di presenta dilanti un Huez.  Corda cu semper den Corte, Fiscal lo bay pidi un boet mas halto pa bo!  Pues si acaso Huez ta haya cu e puntonan di Fiscal ta suficiente convincente den bo caso, e boet lo ta mas halto.  Kizas double, esta 2.000 Florin.

Dado caso bo no por paga mas, DIARIO a mustra den pasado caba cu un boet di 1.000 Florin lo bo tin di sinta 20 dia di castigo den Prison di KIA.  Si acaso e boet bira 2.000 Florin, esey lo ta un castigo di 40 dia cera den Prison.

Mientras tanto, den e anochi di Diamars pa Diaranson, autoridad a detene un total di 13 persona.

 

- Advertisement -

DUNA COMENTARIO

Please enter your comment!
Please enter your name here