Home Gobierno Un tempestad grandi ta yegando Aruba y Parlamento tin di actua rapido...

Un tempestad grandi ta yegando Aruba y Parlamento tin di actua rapido pa ta prepara

1443
0
SHARE
- Advertisement -

Tin mester di 1.300 miyon Florin pa salba e isla

ORANJESTAD (AAN): Diamars mainta a tuma lugar den Parlamento di Aruba, e reunion pa e proyecto di ley pa aproba e presupuestonan di Ministerionan di Gobierno pa 2020, y tambe modifica e ordenanza pa inclui un prestamo di 1.300 miyon Florin (1.300.000.000,= Florin) pa salba Aruba di e crisis di Coronavirus.

E placa aki ta pa reduci e impacto cu e crisis lo benta riba schouder di Gobierno, y cu tin di yuda e isla keda cu su cabez riba awa di awor te cu fin di December 2020.

Algo cu tabata notable ta cu na comienzo di reunion, Presidente di Staten Ady Thijsen a revela cu e reunion no ta uno manera esnan di pasado.  E reunion publico di Staten semper tin di cumpli cu cierto ley y reglamento di ordo.  Pero debi na e Estado di Emergencia aki, Staten a haye obliga di sigui cu e reunion y lagando un banda articulo 26 y 27, a base di articulo 83 di reglamento di ordo.

   REUNION DEN SALA BASHI:

Esaki ta mustra cu normal mester tin quorum den reunion, esta 11 of mas Parlamentario presente den sala.  Pero e biaha aki no a hacie, a base di e hecho cu kier proteha nan mes segun e reglanan cu DVG mes a duna, relaciona cu Social Distance.

Tur 21 Parlamentarionan a palabra cu lo bay mantene si loke Constitucion ta duna, esta cu bo mester tin e mayoria pa ora cu ta ‘ter vergadering’.  Y Diamars nan tabata ‘ter vergadering’, pasobra e Parlamentarionan cu no ta den Sala, tabata ta den nan oficina na Parlamento.

E Parlamentario cu kier hiba palabra lo drenta sala, haya 20 minuut maximo, y asina uno-pa-uno nan ta drenta e sala y bay bek na su oficina.

   FOR DI SURPLUS PA CRISIS:

E mainta a cuminza cu Prome Ministro Evelyn Wever-Croes dunando discurso, a mustra cu e crisis inespera aki a cambia henter e panorama di Presupuesto 2020 manera cu el a wordo entrega na prome instante.

Den un luna di tempo, mundo a cambia full diferente.  Un luna pasa Gobierno tabata contento y bayendo rumbo pa un surplus financiero, pensando riba economianan nobo pa e isla, y mas.  Pero e crisis sin precedente di Coronavirus a cambia mundo di pais y di presupuesto.

Premier Wever-Croes ta hasta sinti, cu e crisis aki na Aruba lo bay hasta cambia e forma di bida, e forma di famianan ta trata otro, cambia e forma cu bo ta saluda otro, con ta bay gana nos pan den futuro.

Te cu Dialuna atardi, Aruba tabatin 833 persona den cuarentena.  Di e grupo di 833 persona aki, como 88 persona den cuarentena (como 10%) ta hende cu tabatin directamente un contacto cu pashentnan cu a haya positivamente e virus Covid-19.

Di e 833 persona den cuarentena, como 745 persona ta hendenan cu a bin den exterior y a wordo poni den cuarentena.

Premier Wever-Croes a bisa cu unavez cu e presupuesto pasa, mesora Gobierno por cuminza busca prestamo y cu esaki cuminza reconstrui e pais den forma di estimulo y mas.

E lider di Aruba a indica cu e ta mira dilanti un tempestad grandi ta acercando.  “E ta uno cu no a ni cuminza ainda,” Wever-Croes a bisa.  “Ainda e peor mester yega.”

Pero despues di tempestad, solo ta sali bek y hunto nos lo reconstrui nos pais.

- Advertisement -

DUNA COMENTARIO

Please enter your comment!
Please enter your name here