Home Labor Un comerciante mester yega na entendimento cu su trahadornan ta con lo...

Un comerciante mester yega na entendimento cu su trahadornan ta con lo pasa den e crisis aki

543
0
SHARE
- Advertisement -

ORANJESTAD (AAN): E crisis inespera di Coronavirus ta afectando trahadornan rond mundo, y na Aruba ya caba Ministro a indica cu por spera como 25.000 hende sin empleo riba e isla.

Hose Figaroa di Sindicato FTA a confirma cu tin incertidumbre tur caminda, incluyendo na e empresanan unda tin un Contrato Colectivo (CAO) firma.

E Sindicato ta ocupa e dianan aki pa atende e salario di luna di Maart.  E bon noticia ta cu mayoria di e companianan cu tin relacion cu FTA lo bay cumpli 100% di e salario. Algun di nan lo desconta dia di vakantie for di dje, y esaki ta algo cu e Sindicato ta tratando di yega na palabracion cu mayoria di nan.

Tambe Sindicato FTA a haya informacion di algun compania pa sa kico nan plan ta pa e siguiente dos lunanan.  Pa sa kico lo pasa cu salario di April y Mei venidero.

Di e forma ey e miembronan di e Sindicato por sa kico por spera den e siguiente dos lunanan.  Pero luna di Juni y Juli?  Esey ta algo dificil pa por papia di dje awor, y tur cos ta depende con e crisis ta desaroya pasobra tin di corda cu frontera pa turismo ta cera y e unico pilar economico no ta moviendo.  Tin influencia riba tur esnan cu ta depende di horeca, incluyendo Gobierno.

Pa awor no por premira mucho leu kico lo ta e consecuencia.  Toch Sindicato ta tratando pa tin un bista pa asina mantene e trahador poco mas trankil.  Pasobra nan ta nota cu tin compania local cu ta manda nan trahador cas sin pago, etc., pero esey nifica cu no por paga e debe, ni come, ni bebe.  Tur esey tin di tene na cuenta.

Aunke ta situacion di crisis, tog legalmente un compania cu kier haci algo pa reduci su gasto, e tin di yega na un areglo prome cu e trahador.  No por djis yega y bisa cu ta manda trahador cas y lage biba cu e consecuencianan.

Berdad cu companianan no por yuda cu e crisis a bin, pero e trahador tampoco no tin culpa.  No por benta e consecuencia full riba e trahadornan, pero duna claridad riba reservanan cu e compania tin, etc.

Companianan cu tin miembro cu ta participa na un Sindicato, e negociacionnan aki ta andando!  Pero tin hopi compania cu no tin afiliacion na Sindicato, y na cierto forma e doño di trabao mester yega na entendimento cu e trahadornan pa nan sa con ta trata e asunto aki.

Sindicato a sinta cu Gobierno na varios ocasion e ultimo dianan aki, pa asina trece nan opinion con pa anda cu e situacion di crisis aki.  E ta un situacion fastioso, pero esey no nifica cu e doño di trabao ta haya carta habri pa haci y deshaci.  Como dunador di trabao bo ta keda cu e obligacion na responde na bo trahador den e tipo di situacion aki.

 

- Advertisement -

DUNA COMENTARIO

Please enter your comment!
Please enter your name here