Home Coronavirus Tin un total di 974 persona den cuarentena

Tin un total di 974 persona den cuarentena

797
0
SHARE
- Advertisement -

Premier Wever-Croes: dialuna no tabata tin casonan nobo

ORANJESTAD (AAN):  Prome Minister Evelyn Wever-Croes a duna di conoce cu e ta contento di wak e reaccion di e comunidad despues cu Shelter in Place (SIP) a drenta na vigor diadomingo ultimo.

El a bisa cu den e di dos dia di SIP por a constata cu tin hende den comunidad cu por comporta disciplina y a sigui cu e medida di keda na cas.

El a remarca cu mester corda cu Coronavirus no ta un virus cu ta bay bishita bo of busca bo. Ta abo mes ta piki’e. Ora bo ta bay den hende, a bisa. Pesey e yamada pa keda na cas y no sali si no ta necesario.

Durante su actualizacion di dialuna anochi, e mandatario a duna di conoce cu no tabata tin casonan nobo di contagio. Esey ta nifica cu e cantidad dialuna anochi tabata 50 caso positivo.

El a indica cu e casonan negativo tabata na 584, e personanan cu a haci test tabata 634, pero banda di esaki a señala cu e personanan den cuarentena tabata na un cantidad di 974.

E 974 persona aki ta parti den nos grupo: esnan cu tabata tin contacto cu casonan positivo (127) y esnan cu a regresa Aruba for di exterior (847).

E ta pidi encarecidamente e personanan cu ta den cuarentena pa por fabor keda na cas y sigui e instruccionnan cu nan a haya for di Departamento di Salubridad Publico (DVG).

Premier Wever-Croes a laga sa tambe cu entrante awe diamars, tin reglanan nobo ta bin na vigor pa esnan cu ta den cuarentena.

Entrante diamars, un Task Force conforma pa personal di DVG y Polis lo cuminsa cu controlnan stricto pa vigila y controla esnan cu ta den cuarentena.

Esnan cu no wordo haya cumpliendo cu e medidanan stipula of ariba caya, lo wordo sanciona y e boetnan por ta entre 1000 y 10.000 florin, e mandatario a subraya.

E Coronavirus Task Force lo por bishita bo (spot check) inespera of yama bo y si bo no ta cumpliendo cu e cuarentena na cas, e multa lo wordo aplica mesora.

E personanan cu wordo haya un di dos biaha violando e medidadanan di e cuarentena lo confronta multanan mas halto.

“Mustra disciplina y keda paden”, Evelyn Wever-Croes a finaliza bisando.

 

- Advertisement -

DUNA COMENTARIO

Please enter your comment!
Please enter your name here