Taxistanan tambe a aplica pa F.A.S.E. pa haya yudanza mensual

    958
    2
    SHARE
    - Advertisement -

    ORANJESTAD (AAN): For di diferente fuente, DIARIO a bin compronde cu Taxistanan cu pa como 2 siman caba no ta hayando entrada, a aplica pa e sistema di yudanza di FASE.

    Esaki ta bin despues cu e crisis mundial di Coronavirus aki a paraliza completamente e trabao di transporte publico na Aruba y den region.  No tin turista mas drentando via Aeropuerto.  Tampoco no tin turista pa transporta di un lugar pa otro na Hotel.  Y pa colmo tabatin e peligro tambe cu e chauffeur ta riesga su mes di wordo contagia cu e malesa, cu algun a opta pa djis keda cas.

    Y esaki a bin na e momento di mas malo cu tin!  Pasobra ya caba tabatin notablemente un slow down di comienzo di aña caba di turistanan cu ta busca Taxi pa transporte.  Pues e cash flow di Taxistanan a bira menos, y awor esaki a bin dal nan.

    E crisis di Coronavirus a bin na un momento inespera pa hopi Taxista.  Siguiendo loke ta pasando riba scenario internacional, esaki a yega y den un fraccion di tempo ata turistanan a stop di bula y awor avionnan no ta ni ateriza mas.  Tur esaki den intento pa stop e virus di plama.  Y asina e bida di Taxista a bolter 180 grado.

    Sin turista, y sin ningun hende pa transporta, e Taxistanan a keda sin placa pa cumpra comestible of remedi.  Nan entrada a cay mesora na 0,00 Florin.  Algun no tin ningun buffer pa sobrevivi un tiki, pasobra na Aruba e gasto pa mantene un vehiculo di luho cu ta ser opera como Taxi, ta basta halto.

    YUDANZA DI F.A.S.E.

    Stress di tur e Taxistanan a baha, na momento cu Ministro Glenbert Croes a revela cu den e situacion di crisis social aki, a crea e Fondo FASE (Fondo di Asistencia Social di Emergencia).  E fondo ta bay yuda tur esnan cu a perde trabao, un suma di 950 Florin mensual.   E ta rekeri pa esnan cu a perde trabao pa registra si na e FASE Help Desk.

    Na comienzo e Taxistanan a compronde cu kizas nan lo no cay bao di FASE.  Sinembargo Ministro Xiomara Maduro a revela den Parlamento, cu esnan cu ta Self-Employed tambe ta cay bao di FASE, y esey ta inclui Taxistanan.

    For di diferente fuente, DIARIO a compronde cu tin hopi Taxista cu a registra pa FASE y nan a haci esaki riba e website di fasehelpdesk.com y a inclui potret di nan carchi geel y carchi berde.

    Prome Ministro Evelyn Wever-Croes a splica, cu unavez cu bo registra pa FASE, e ora eynan mes nan lo yuda e aplicante pa e por haya areglo pa pago di awa via WEB Aruba NV.  FASE tambe ta bay intermedia pa asina e persona haya areglo di pago di coriente na NV Elmar, como tambe Setar NV, FCCA, y tambe VKB.

    Riba Diabierna ademas a bin nota cu Ministro Xiomara Maduro a anuncia cu tur esnan cu tin un areglo di pago cu DIMP, tin di tuma nota cu esaki a wordo aplaza.  Pues esaki tambe ta bon noticia pa Taxistanan.  Fuera di e hecho cu diferente Banco a ofrece tres luna cu no tin di paga Hipoteca y algun prestamo.

    Tur esaki lo yuda e Taxistanan keda cu cabez riba awa.  E 950 Florin por yuda e ora cubri lo mas basico den cuminda pa sobrevivi cada luna.

     

    - Advertisement -

    2 COMMENTS

    1. Taxistanan ta empresario liber ppz ers nan a gana hopi i mester a spaar hopi. Un negociasion con nan ta baimpaga back ta na su lugar, pero den caso cu no pidi no mester ofrece nan. Esun cu di berdad mester por hanja.

    DUNA COMENTARIO

    Please enter your comment!
    Please enter your name here