Home Cultura Seminario tocante di co-produccion di solucion sostenibel pa retonan climatico den islanan...

Seminario tocante di co-produccion di solucion sostenibel pa retonan climatico den islanan Caribe Hulandes

66
0
SHARE
- Advertisement -

Museo Arkeologico Nacional di Aruba a organisa:

ORANJESTAD (AAN) Recientemente  a tuma luga na Museo Arkeologico Nacional di Aruba (MANA) un seminario tocante di co-produccion di solucion sostenibel pa retonan climatico den islanan Caribe Hulandes. E seminario aki tabata inicialmente titula Island(er)s Under Threat.

Despues di a bishita e islanan di Caribe Hulandes, prome cu  a yega Aruba,  e indicadornan a realisa cu e titulo no tabata cuadra cu e capacidad di e populacionan di Caribe pa anda cu retonan climatico y desasternan natural.

E feedback haya riba e diferente islanan di Caribe Hulandes a haci cu e organisadornan a realisa cu e isleñonan semper a tuma rienda y a supera e obstaculonan cu nan tabata encontra y tabata tuma accionnan pa asina sigui bay dilanti. Pesey nan a cambia e titulo pa ‘ Isleñonan na Timon’ loke ta cubri e forma con poblacionan di islanan di Caribe Hulandes ta tuma rienda y supera e retonan cu ta pasa den nan bida.

E seminario aki a ser coordina y organisa door di MANA riba peticion di Profesor Corinne Hofman, ‘Professor of Caribbean Archaeology’ na Universidad di Leiden y Dr. Francio Guadeloupe ‘Senior Researcher & Lecturer’ na Universidad di Amsterdam & Koninklijk Instituut voor Taal-, Land- en Volkenkunde.

Profesor Corinne Hofman y Dr. Francio Guadeloupe a organisa e seminario na e otro islanan di Caribe Hulandes y siman pasa a lidera e seminario na Aruba.

Mescos cu na e otro islanan di Caribe Hulandes e seminario tabata tin como meta pa haya informacion di      GO’s NGO’s y publico en general tocante preocupacionan y ideanan relaciona cu  adaptacion social door di  cambio di clima,  su efectonan pa cu nos isla y e forma con lo por atende cu e retonan aki.

Sr. Pancho Geerman, director ad interim di MANA a dirigi algun palabra durante apertura di e seminario na nomber di Minister di Cultura.

El a subraya cu e region Caribense mester ta central den debatenan tocante e vulnerabilidad di clima, ya cu e islanan den Caribe ta confronta subida di nivel di lama, tormenta, erosion na costa y degradacion desde cu e islanan a wordo habita 7.800 pa 4.000 aña pasa.

E efectonan menciona di cambio door di naturalesa tin un impacto riba e condicion di biba di e habitantenan di e islanan y tambe riba e preservacion di  patrimonio cultural y natural.

E iniciativa di e academiconan Hulandes hunto cu organisacionnan y academiconan den region Caribe ta un ehempel di un berdadero colaboracion den Reino Hulandes. E prome propuesta di proyecto di dr. Hofmann y Dr. Guadalupe lo yuda nos isla hopi.

Sr.Geerman a enfatisa cu e seminario aki tambe ta un oportunidad pa fortalece e colaboracion den Reino. Na nomber di Minister di Cultura, sr. Geerman a desea tur presente un encuentro fructifero y cu hunto e participantenan por contribui na solucionnan sostenibel pa anda cu cambio di clima.

Durante e seminario Corinne Hofman y Dr Francio a presenta nan puntonan di investigacion y alabes a ricibi comentario y a interactua cu participantenan pa asina por adapta y formula nan preguntanan di investigacion  a base di locual ta ser considera di vital importancia pa nos Pais Aruba.

E seminario a ser bon atendi y e participantenan a provee hopi informacion y ideanan valioso cual a duna e presentadornan un bon bista di e preocupacion.

E seminario tabata un exito y awor Professor Hofman y Dr Guadeloupe lo incorpora e informacion obteni di e participantenan den nan proposicion pa asina sigui pa e di dos rond di e proceso di seleccion di e Organisacion Hulandes di Ciencia (NWO) relaciona cu investigacion Caribense multidisciplinario

- Advertisement -

DUNA COMENTARIO

Please enter your comment!
Please enter your name here