Home Cultura Obra di 16 di Maart ta pa yuda Fundacion Pro Cultura Arubano...

Obra di 16 di Maart ta pa yuda Fundacion Pro Cultura Arubano yega na nan propio caha di orgel

56
0
SHARE
- Advertisement -

*Ta bay ta un show educativo y comico hopi varia

ORANJESTAD (AAN): Fundacion Pro Cultura Arubano ta bay tin un obra teatral den Cas di Cultura riba 16 di Maart.

Durante un conferencia di prensa Diamars presidente di e fundacion Lilian Besselink a splica cu e obra ta inclui diferente sketch cu hendenan hoben te cu hendenan di edad halto.

“E obra yama ‘Tardecito Crioyo, Na Caminda pa Celebracion di Himno y Bandera’”.

“Nos fundacion kier yega na nos propio caha di orgel y pa yega na un caha di orgel no ta facil”.

“Pesey nos a dicidi cu nos ta bay haci un obra cu tur e  miembronan cu nos tin, pa asina recauda fondo pa nos yega na nos caha di orgel”, segun Besselink.

El a splica cu e intencion ta pa hinca nos muchanan mas den caha di orgel.

Segun Besselink, un caha di orgel ta algo valioso.

Buchi Boekhoudt ta dispuesto pa traha e caha di orgel pa e fundacion, pero esaki ta costa bastante placa.

Pesey e show ta hopi importante.

E sketchnan ta bay inclui sketchnan comico, grupo di baile y mas.

Ta bay tin tambe un persona cu limitacion visual, cu ta bay toca un acordeon.

Hubert Geerman, tambe di e fundacion, a splica cu riba 16 di Maart for di 6’or di atardi te cu 9’or di anochi ta bay tin siguridad presente pa cuida e autonan.

Jeanine Wester Orman di Fundacion Pro Cultura Arubano tambe a hiba palabra.

El a haci un invitacion na hendenan hoben te cu hendenan mas grandi pa bin wak e obra.

Orman a splica cu e tradicion verbal ta algo cu ta pasa bay, pues ta bunita pa tur hende presencia kico nan ta bay trece pa dilanti.

“Ta bay tin hopi sketch, hopi musica, hopi mensahe y cosnan hopi educativo”, segun Orman.

Antonia Hilario tambe ta forma parti di Fundacion Pro Cultura Arubano y durante e conferencia di prensa Diamars, el a trece dilanti cu e show ta bay ta hopi varia y no solamente nos muchanan lo wordo educa, sino tambe nos hobennan y nos grandinan.

“Un parti hopi bunita y educativo ta e hecho cu ta bay tin dos señora di edad grandi cu ta bay conta nos cosnan y chasconan di Aruba di antes y awor”, segun Hilario.

 

- Advertisement -

DUNA COMENTARIO

Please enter your comment!
Please enter your name here