Home Cultura “Festival Un canto pa Aruba su himno y bandera” dedica na Edjean...

“Festival Un canto pa Aruba su himno y bandera” dedica na Edjean Semeleer

122
0
SHARE
- Advertisement -

Pa su aporte excelente na cultura Arubano…

ORANJESTAD (AAN):  Fundacion folklorico di festivalnan “Un canto pa Aruba su himno y bandera” a anuncia cu pa aña 2020 lo dedica e festival aki na nos cantante Edjean Semeleer cu alabes lo ricibi un reconocemento y homenahe special durante e gran anochi final di e festival aki diasabra proximo.

Un reconocemento y elogio bon mereci pa Edjean su aporte excelente, continuo y impresionante na cultura di nos isla. Un hoben talentoso y multifacetico, cu un amor ferviente pa nos cultura.

Fundacion folklorico di festivalnan “Un canto pa Aruba su himno y bandera” ta considera nos orguyo nacional Edjean Semeleer como un di e mayor exponentenan y protectornan di e cultura Arubano y un di e promotornan di mas importante y influyente di nos herencia cultural. E ta un artista local cu un carera musical y logronan sumamente impresionante, cu ta stimula un sentido di orguyo serca nos localnan y ta fomenta compromiso pa e bienestar y progreso di Aruba.

13 di maart 1994, Edjean su carera ta cuminsa oficialmente na edad di 10 aña cu su participacion na festival Voz-i-Landia. Den poco tempo Edjean a bira un di e cantantenan mas stima y solicita riba Aruba.

Hopi di nos por corda varios presentacionnan memorabel y su cancionnan cu a bira exitonan grandi y inmortal, specialmente su cancionnan dedica na nos isla, nos hendenan y nos himno y bandera.

Na maart 2001 Edjean a participa pa prome bes na festival “Un canto pa Aruba su himno y Bandera” cu un composicion di Casin Giel titula “Alma y curazon di nos himno y bandera” y a bira ganador absoluto di e festival aki. Asina a sigui varios participacion mas di Edjean y varios triunfo mas den e festivalnan aki. Edjean ta nos actual “Rey di Reynan” di Dande y banda di esaki a sali “Rey di Dande” na 3 ocasion. Un artista cu den su 26 aña di carera musical a logra masha hopi y a enrikece nos cultura y herencia musical di un forma admirabel. Notabel ta cu esaki Edjean a logra na un edad hopi hoben.

Banda di su numeroso conciertonan sold-out, Edjean ta brinda plataforma y oportunidad na otro artistanan local pa nan tambe por briya y resalta riba escenario, haciendo bon uzo di su talento tambe door di organisa y presenta varios concierto pa yuda recauda fondo pa un lista largo di organisacion, causa y fundacion local, recaudando te cu awor mas di 300 mil Florin pa e organisacionnan aki desde aña 2014.

Awendia, como co-fundador y embahador di Fundacion Go Cultura, Edjean ta sigui marca pasonan firme y positivo pa nos cultura por tin un lugar mas central y importante den desaroyo di nos isla y pa e creatividad di nos artistanan por ricibi mas elogio y sosten. E ta un di e motornan principal tras di un di e proyectonan mas recien cu nos por menciona, cu ta un proyecto hopi positivo cu ta conta cu un sosten hopi grandi for di nos comunidad. Ta trata aki di e restauracion y conservacion di Teatro Ser’i Noka.

Ta menciona solamente algun di su iniciativanan y logronan, considerando cu si dedica na tur, lo no tin suficiente pagina pa termina. Ta gradici Edjean inmensamente pa tur loke el a haci, ta haciendo y lo sigui haci pa nos Pais, nos hendenan y nos cultura.

Alabes ta invita henter pueblo di Aruba pa tey presente dia 14 di maart riba Plaza Libertador Betico Croes, no solamente pa apoya y disfruta di e presentacion di tur e artistanan participando den Festival “Un canto pa Aruba su Himno y Bandera” pero tambe pa rindi elogio hunto cu nos na un gran yiu di tera cu semper a lucha pa proteha, promove y engrandece nos cultura.

 

- Advertisement -

DUNA COMENTARIO

Please enter your comment!
Please enter your name here