Elton Lacle di Hoodchamps a keda babuca cu na Aruba tin un famia cu 3 yiu bibando 1 aña caba sin coriente

    10268
    0
    SHARE
    - Advertisement -

    ORANJESTAD (AAN): Elton Lacle ta un hoben kende no a lanta cu mucho cos, y despues di bay Hulanda y sigui su estudio, el a dicidi na habri un Fundacion pa yuda Muchanan na Aruba.

    Asina a lanta Hoodchamps na Hulanda, y awor esaki ta na Aruba tambe.  El a ser crea na Aruba cu e meta pa yuda esnan di menos recurso haya oportunidad igual na riba e isla, pa asina nan ta envolvi den deporte, cultura, y asina sobresali den bida cu oportunidadnan igual.  Tambe ta envolvi nan empuhe pa bay dilanti den enseñanza.

    Hoodchamps ta haci su best hunto cu partnernan na Hulanda y Aruba pa traha duro riba nan meta pa cuminza duna guia na e grupo aki cu tabata creciendo y bira alarmante.

    Den un entrevista cu DIARIO, Lacle a splica cu den 7 aña cu el a cuminza cu Hoodchamps, el a bin nota cu tin un progreso cu e muchanan cu nan ta yudando, principalmente esnan di menos recurso. El a bin nota desaroyonan positivo den esaki.

    Hoodchamps cu su progreso, tin di haber cu e empuhe di cierto docente cu nan ta traha cu nan, incluyendo Mario Nooijen di Colegio Santa Filomena, Sheila Tromp di Pius X School.   E dos docentenan a haci nan trabao duro pa asina yuda e muchanan aki na nan scol pa bay dilanti na forma positivo.

    Segun Lacle, tin varios scol mas na Aruba cu ta colabora cu Hoodchamps, y aki tambe ta mirando desaroyo positivo.  Pero Lacle mes ta pensa cu por haci aun mas.

    E Fundacion di Hoodchamps ta spera di por haya mas apoyo di pueblo, comercio, y scolnan.  Den ultimo siete aña, Lacle ta hopi satisfecho con e ta bayendo.  Nan ta haciendo e trabao cu hopi amor.  Pueblo tin di mira e importancia di e trabao, pa asina hunto por haci mas pa e muchanan.

       UN AÑA SIN CORIENTE:

    Semper ora cu Elton Lacle bin Aruba, e kier ta envolvi cu e hoben- y famianan tambe, pasobra tin como 156 mucha riba lista y cu ta haya donacion pa asina nan por participa.  A sali na cla cu tabatin hopi mayor cu no tabata sa mes cu ta Hoodchamps ta contribui personalmente cu e muchanan. Y pesey nan ta bay den combersacion cu e famianan.

    Lacle ta mirando awor cu su mesun wowonan, con e situacion ta.  E siman aki mes el a sinta papia cu un famia local cu ta bibando pa 1 aña caba sin coriente.  Elton Lacle a haya esaki hopi asombroso, pasobra con un famia por biba pa asina hopi tempo sin coriente, siendo cu nan tin 3 mucha na cas.  E ta casi imposible pa compronde.  E rol di Maatschappelijk Werk na Aurba mester ta mas intensivo.

    Awior cu el a yega, el a bin cu un amiga Lucy cu a yuda pa traha un workshop di pintua na Pius X school, y e muchanan a goza hopi mes.

    Tambe Lacle a yuda cu organizacion di un Bike Tour pa e alumnonan di Pius X School.

    El a splica con Pius X School y Colegio Santa Filomena tin un programa piloto pa cu educacion di ciclismo riba e isla.  Susan van den Sluis (di alcaldia di Den Haag na Hulanda) ta encarga cu esey, y nan ta mirando esey como algo positivo.

    Lacle a indica cu den dianan venidero nan tin un otro programa prepara, pa e muchanan di Zeewijk.  Tambe ta hayando apoyo di algun comerciante, y tin plan pa hiba grupo di mucha pasa dia divertido na De Palm Island.  Tin algun mucha cu no conoce ni nan propio isla como debe ser.

     

    - Advertisement -

    DUNA COMENTARIO

    Please enter your comment!
    Please enter your name here