Home General Distanciamento Social Fisico, ta birando Acercamento Social Digital

Distanciamento Social Fisico, ta birando Acercamento Social Digital

235
0
SHARE
- Advertisement -

ORANJESTAD(AAN): For di basta tempo caba desde cu tecnologia a avanza masha hopi mes, e critica grandi riba esaki ta cu hendenan y muchanan sigur, ta pasa demasiado tempo riba nan aparatonan digital cu ta inclui celular, laptop y tablet.

Unda cu antes muchanan tabata hunga bala riba caya y cura di scol of tabata cana den mondi cu stichi, awor mayoria constantemente ta riba nan aparato digital.

Sinembargo, awor cu mundo henter a wordo confronta cu e Coronavirus y ta wordo conseha pa hende participa na Distanciamento Social (Social Distancing), ta net e aparatonan digital aki ta mustrando di ta hopi util.

No solamente e aparatonan aki por yuda cu mas hende por traha for di cas, sino tambe e aparatonan aki ta yuda hende sinti nan mes menos nan so den e temponan aki cu fisicamente nan ta wordo conseha pa tene un distancia for di otro.

Mirando cu e chens pa wordo contagia cu e virus ta mas grandi si bo tin contacto fisico of ta den cercania cu varios hende, e mihor manera pa proteha bo mes ta pa keda leu di hende.

Esaki ta pone si cu hendenan cu ta custumbra di ta den presencia di varios amigo of famia, por cuminza sinti nan mes un tiki nan so.

Tin hende ta sinti laf si nan no por bay come of bebe algo cu un amigo of bay hunga domino.

Awor ta mihor pa evita e cosnan aki, pero usando bo celular bo por keda den basta bon contacto cu bo hendenan.

Bo ta wak awor con activo hendenan ta riba social media incluyendo sigur Facebook y asina ta sinti cu nan tin algo di haci y nan ta sinti contacto cu hende.

E no ta un contacto fisico, pero e ta un contacto social digital.

Pesey por bisa cu Distanciamento Social Fisico ta contribui na un Acercamento Social Digital, cu den e temponan aki por ta un arma util pa combati di aburimento y soledad.

- Advertisement -

DUNA COMENTARIO

Please enter your comment!
Please enter your name here