Home General Covid-19 ta avansa na forma explosivo

Covid-19 ta avansa na forma explosivo

1456
0
SHARE
- Advertisement -

Cantidad di paisnan afecta y casonan ta aumenta cu rapidez

*Ekipo pa trata casonan mas serio preocupacion Aruba y mundo

*Aruba mester evita casonan serio cu mester di Cuido Intensivo 

ORANJESTAD  (AAN) — E forma cu Covid-19 ta plama rond mundo, a paralisa bida normal riba planeta tera. Ayera tabata casi imposibel keda na haltura di cifranan total na mundo, debi na e forma cu e total di caso tabata sigui subi mientras e malesa tabata wordo registra na mas y mas pais.

Ciencia medico rond mundo ta trata na documenta tur desaroyo pa den futuro preveni situacionnan similar na e coronavirus nobo, pa cual segun informacion confirma ayera, mundo a bati alarma mucho laat.

Despues di e experencia cu SARS na 2002, paisnan yuda pa e sistemanan computerisa a cuminsa ta compila informacion importante di pashent pa na momento cu un malesa contagioso haci su entrada, mundo actua.

China caminda SARS a haci su entrada na 2002, a crea banconan di informacion computerisa pa actua cu e prome señal di un malesa contagioso. E sistema lo a faya cu COVID-19 debi na informacionnan cu awor ta indica cu tabata tin mediconan na China cu a bay contra regla y no kier a pasa “e mal noticia” di un enfermedad respiratorio cu a cuminsa presenta.

E virus a haya chens di plama den tempo record rond mundo cu personanan cu tabata biaha di China pa otro pais.

Expertonan na China ta admiti cu tres siman a bay perdi na Januari. Despues tabata tin mas atencion pa e luga caminda e virus a cuminsa cu pa biaheronan cu tabata hiba e virus rond mundo, manera pa Italia y costa West di Merca.

Informacionnan cientifico ta mustra cu mundo no a realisa kico e tabata confronta. Italia, manera DIARIO a yega di splica, tabata laat den actua y ta desaster e malesa a haci.

E cifranan cu DIARIO ta presenta awe ta mustra e aumento tremendo cu ta pone un peso riba centronan di cuido medico, sigur hospital, cu no tabata prepara pa e Coronavirus nobo.

Na nivel internacional ta wordo trata pa produci e aparatonan pa yuda hende hala rosea, cu ta e ekipo mas importante pa actua den caso di COVID-19 cu ta afecta pulmon y ta stroba hende di hala rosea y asina ta afecta organonan vital.

Fabricanan ta trata na produci e ekiponan na gran cantidad a base di pedido di paisnan grandi cu ta manda nan pashentnan di un hospital pa otro.

E situacion di isla ta haci cu na Aruba mester duna tur cooperacion pa evita e malesa pa e hecho cu e capacidad di ekipo ta limita pero tambe e posibilidad pa cooperacion cu hospitalnan ya cu ta un solo hospital Aruba conoce.

Informacionnan di experto ta indica, cu gobierno na Aruba a actua na tempo y a tuma e decision corecto pa cera Aruba, cu mester tene cuenta cu mundialmente e culminacion di COVID-19 na mundo ta wordo spera y cu April 2020 lo bira e luna durante cual por determina kico ta bay pasa realmente cu e malesa cu a paralisa mundo.

- Advertisement -

DUNA COMENTARIO

Please enter your comment!
Please enter your name here