Home Actividad Especial Conmovedor y impactante tabata e encuentro di e comunidad di Aruba cu...

Conmovedor y impactante tabata e encuentro di e comunidad di Aruba cu Eva Schloss

249
0
SHARE
- Advertisement -

ORANJESTAD (AAN):   Eva Schloss a bishita Aruba pa comparti cu e comunidad di Aruba su storia impactante como un di e sobrevivientenan di e Holocausto Nazi den añanan 40.

Ademas di ta un di e personanan cu a lucha pa sobrevivi durante cu e tabata den e campo di exterminio na Auschwitz, e tabata amiga di infancia y despues ‘stepsister’ di Anne Frank, famoso pa su buki ‘Anne Frank’s Diary’.

Diadomingo, den e ballroom completamente yen di Hilton Hotel, Rabbi Ahron Blasberg a yama tur hende bonbini y a presenta su casa Chaya kende tabata e persona encarga di dirigi e entrevista cu Sra. Schloss.

Eva Schloss durante su presentacion a duna di conoce tur detaye di su bida, con su famia a wordo persigui na Austria despues di e invasion Aleman y con nan a yega Belgica y Hulanda, huyendo di e nazinan.

Eva Geiringer, tabata tin apenas 8 aña ora cu el a conoce Anne Frank, un mucha muher aleman, descendiente di hudionan cu a bira su bisiña y tambe su amiga.

Esey ta e inicio di e storia, pa despues bay den detaye riba con nan famianan a wordo deporta pa Auschwitz, un campo di concentracion horibel na cual el a sobrebibi, mientras cu su amiga Anne no a logra. Anne a muri, despues di dos aña y mey oculto, di un malesa den e campo di exterminio.

E unico sobreviviente di e famia di Anne tabata su tata, Otto. Otto Frank a casa despues cu e mama di Eva, cu tambe a sobrevivi y di e forma ey, Eva a bira e stepsister di Anne Frank, su amiga di infancia.

For di 1985, Eva Schloss a dicidi di preserva e memoria di Anne Frank pa medio di conferencianan manera esun teni na Aruba. E ta hiba rond mundo un mensahe di inspiracion, speranza, determinacion, di paz y di no na e discriminacion.

Prome Minister Evelyn Wever- Croes tabata presente y durante su discurso el a haci un observacion a base di e situacion humanitario na Venezuela. Tambe a subraya e echo cu 75 aña pasa miles di hudio y prisioneronan na e camponan di exterminio manera Auschwitz a wordo libera. Lamentablemente, miyones di sernan humano si a fayece durante e epoca aki di discriminacion y xenofobia.

Prome cu e conferencia di Eva Schloss, tabata tin un ‘Meet and Greet’ unda publico por a saluda y haya e buki ‘Eva’s Story’ firma door di e mesun Eva. Un momento unico y bunita.

Pa finaliza, un grupo di 6 persona residente a haya oportunidad di cende un bela pa recorda nan familiarnan cu a fayece of cu a sobrebibi e epoca hororoso aki di Holocausto. Un momento sigur hopi emotibo, cual a wordo acompaña cu un tributo musical na honor di e victimanan y sobrevivientenan.

Mester subraya cu e evento aki tabata organiza door di Chabad Aruba. Palabranan di felicitacion na Sra. Claudia Ponson y e comite organizador di e evento historico aki.

- Advertisement -

DUNA COMENTARIO

Please enter your comment!
Please enter your name here