Home General Triple-A lo por haya su mes negociando cu e dos sindicatonan di...

Triple-A lo por haya su mes negociando cu e dos sindicatonan di forma separa

133
0
SHARE
- Advertisement -

Mediador Anselmo Pontilius:

ORANJESTAD (AAN): Den e situacion sindical cu a presenta na Aeropuerto Internacional Reina Beatrix (AAA),  entre e Federacion di Trahadornan di Aruba (FTA) y Sindicato di Trahadornan di Aruba (STA), ambos cu representacion na Triple A, DIARIO a acerca Mediador sr. Anselmo Pontilius, relaciona cu e desaroyo aki.

Pontilius a splica cu aki tin dos situacion. Uno ta cu si no ta Augustus, ta September di aña pasa cu FTA a pidi un referendum den cual di e 170 trahadornan, cu derecho di voto, e sindicato aki a haya e mayoria.

E ley ta stipula cu e dunador di trabao tin e obligacion di negocia cu e sindicato cu tin representacion mayoritario. Esey no ta kita afo cu e otro sindicato tambe tin derecho di representa trahado. Den e caso aki STA a keda representa un grupo minoritario.

Pa ley sindicato minoritario por pidi un referendum seis luna despues cu esun prome a tuma lugar, y STA a haci esaki. Nan a pidi referendum no pa e totalidad sino pa e trahadornan di cinco of seis departamento di aeropuerto.

Den practica por pidi referendum pa un of otro departamento y den e caso aki e sindicato a pidi referendum y aworaki ta den e proceso.

“Na prome lugar, mester verifica loke a wordo pidi, cu e ta di acuerdo cu e reglanan, y ta Mediador su obligacion pa publica e referendum, a no ser cu e dunador di trabao bisa cu e tin suficiente prueba y cu e ta reconoce e organizacion. Pero si no ta asina lo tin referendum pa e diferente departamentonan, tanten cu e sindicato mustra riba papel cu tin e mayoria, esta e 50% plus 1”, sr. Anselmo Pontilius a subraya.

Mediador a reitera cu si e dia ey e referendum di STA haya e mayoria di e departamentonan aki, e dunador di trabao tin e obligacion di sinta cune tambe, na mesa y particularmente, pa loke ta e contrato colectivo.

El a splica tambe cu na momento cu FTA a gana e referendum, STA tabata tey caba y a keda cu su miembronan, y nan ta exigi representacion pasobra nan ta paga contribucion tur luna. Esey no kiermen cu STA a haya miembronan nobo.

Nan tin miembronan existente, pero loke nan ta insisti riba dje ta pa toch, nan haya e derecho di negocia e CAO, y mediante e referendum nan kier mustra cu nan tin mayoria den e departamentonan concerni.

Aunke STA tin minoria, pero nan tin derecho tambe y esey e trahadornan ta exigiendo mediante nan sindicato. Sr. Pontilius a señala cu ya e dunador di trabao ta na mesa di negociacion cu e sindicato FTA y e por haya su mes ta negocia, separadamente, cu dos sindicato; of un ta bin.

- Advertisement -

DUNA COMENTARIO

Please enter your comment!
Please enter your name here