Muher na Amsterdam a bira e di dos caso confirma di Coronavirus

    279
    0
    SHARE
    - Advertisement -

    Dos yiu di dje tambe ta mustrando sintoma

    ORANJESTAD (AAN): Tabata Diahuebs cu mundo a bin haya sa, cu un homber na Tilburg (parti zuid di Hulanda) a wordo detecta di tin e Coronavirus Covid-19, y mesora el a wordo isola.

    Diabierna a habri y Salubridad Publico RIVM di Hulanda a haye ta revela cu un otro caso a ser registra, y e biaha aki na Amsterdam.

    Autoridad a divulga cu e muher ta procedente di Diemen, cu ta un suburbio pafo di Amsterdam, y el a wordo diagnostica cu Covid-19.  El a bira e di dos Hulandes cu e males aki.

    E muher aki no tin conexion cu e prome victima Hulandes, pero sorprendentemente e muher aki tambe a bishita e region di Lombardy na Italia, unda e virus ta plamando rapidamente.

       DOS YIU TA MALO:

    Desde Diahuebs anochi a haya confirmacion, y e muher a ser poni na cuarentena na su mesun cas.  Autoridadnan di salud awor ta tratando di busca tur hende cu a yega di tin contacto cune desde cu el a regresa di Italia.

    Alcalde Femke Halsema a revela tambe cu e muher aki tin tres yiu, y ta parce cu dos di nan tambe ta mustrando sintoma di e malesa aki.  Pero te ainda no ta sigur si acaso nan tambe ta contagia.

    Toch ya caba GGD Amsterdam a test e pareha di e muher, y su tres yiunan.  Kizas Diasabra mainta lo haya sa resultado di nan.  Ademas a revela cu algun miembro di famia di e muher tambe tin keho di salud, pero segun GGD esey no ta motibo ainda pa nan wordo hospitaliza.

    Mientras tanto a cuminza focus riba scol di e yiunan!  Pesey mes tur mayor di Laterna Magica (scol basico di un di e yiunan) a haya un carta na cas cu e peticion pa nan keda vigila nan yiunan bon, como cu e muher infecta ta hopi activo eynan.

    Muchanan di e Creche Atlas Arena tambe na Amsterdam Zuidoost a dicidi pa cera nan porta pa dos siman, debi cu un di e yiunan di e mama infecta ta bay eynan.

    Autoridad no a revela nomber di e di tercer scol, pasobra e mucha ey sinembargo no ta dunando ningun señal di tin sintoma.

    No obstante cu un persona na Diemen tambe tin e Coronavirus, autoridad na Amsterdam a dicidi pa no tuma medida relaciona cu esey.  Nan ta bisando publico cu no tin ningun motibo pa preocupacion, segun Alcalde Halsema.  E ta indica cu eventonan y tambe weganan di futbol por sigui normal.

    E muher cu tin e virus, ta trahando na Hospital UMC Amsterdam.  E muher mes ta biba na Amsterdam, pero temporalmente e ta na Diemen como cu su cas na Amsterdam ta wordo renoba.

       PROME CASO:

    E prome victima Hulandes ta un homber di 56 aña di edad di e pueblo Loon op Zand cu ta keda net panort di Tilburg.  El a wordo hospitaliza Diaranzon despues di a sali positivo dos biaha cu testnan haci.  E ta isola aworaki den un unidad di cuarentena na Elisabeth-TweeSteden.  Prensa Hulandes a revela cu e homber ta responde basta bon na tratamentonan ricibi.

    E homber aki tambe a caba di regresa for di un bishita na e region di Lombardy na Italia, unda como 655 hende a wordo diagnostica cu Coronavirus Covid-19, y ya caba 17 hende a fayece.

    Autoridad na Tilburg ta tratando di sigui tur e pasonan cu e homber aki a haci na Tilburg desde cu el a regresa di Italia.  Varios hende a informa e emisora Omroep Brabant cu e homber aki a hasta celebra Carnaval na tanto Tilburg, y tambe e Carnaval di Loon op Zand den weekend cu a pasa.

    Tur hende cu tabatin contacto cu e homber aki, awor ta bao vigilancia pa purba stop e virus di sigui plama den Hulanda.  Esey ta encera cu ta bay tuma na temperatura dos biaha pa dia, y raporta esaki na un directiva local di salud.

    Organizacion Mundial di Salud (WHO) a bisa cu e sintomanan comun di infeccion di Covid-19 ta inclui problema respisatorio, keintura, tosamento, dificultad pa hala rosea, y bo ta hala rosea cortico.

    Riba e potret aki por mira momento cu na Amsterdam ta revelando loke a pasa, y tey presente e Alcalde Erik Boog di Diemen y tambe Alcalde Femke Halsema di Amsterdam.

    - Advertisement -

    DUNA COMENTARIO

    Please enter your comment!
    Please enter your name here