Home Hudicial Mucha muher a mira con tata a choca su mama mata

Mucha muher a mira con tata a choca su mama mata

612
0
SHARE
- Advertisement -

Tratamento di e caso tabata hopi emocional

ORANJESTAD (AAN): Diabierna mainta e tuma lugar e caso penal cu Ministerio Publico a cuminsa contra e homber A.D., kende ta worde acusa di a choca mata su partner difunto Reynalda Kock riba 23 April 2019, den presencia di nan yiu muher.

Den sala di Corte tabata presente familiarnan di e victima den e sala abao. Ora cu A.D. a pidi disculpa na famianan di e victima y tambe su dos yiunan y su famia, practicamente tur sinta den tribuna a cuminsa yora. Hasta A.D. tabata wowo yen di awa. Hues a dicidi di pospone e caso pa 10 minuut pasobra e situacion tabata hopi emocional.

Den e articulo aki DIARIO ta publica e tratamento di e caso cu a tuma basta tempo. Den un otro articulo ta publica e exigencia di Fiscal y den un otro articulo e defensa di abogado.

   PROBLEMA DEN PAREHA:

Hues a bisa cu e caso lo ta dificil y familiarnan di tanto victima como e sospechoso tabata presente. E famia di e victima a entrega demanda di daño. E ruman muher morocho di e victima tabata presente.

Hues a bisa cu A.D. a declara na Polis cu el a choca e victima, cu kende e tin un relacion di 13 aña y cu 2 yiu, un mucha di 5 aña y un otro di 9 aña. El a bisa cu e dia ey tur cos tabata normal. Nan tabata 3 pa 4 aña separa pero tur dia nan tabatin contacto cu otro. E tabata bay tur dia cerca e victima.

Segun A.D. debi cu e otro ruman muher morocho di e victima a bay biba eynan, e victima a dicidi cu A.D. no por keda eynan mas. A hasta yama Polis pa sak’e. Segun A.D., e ruman muher lo tabata causa problema.

E weekend promer tabatin problema. Esey tabata riba un diasabra y A.D. a bisa Hues cu e tabata papia cu e victima via cellular y diripiente tabatin un homber a intermedia den nan combersacion. El a bay eynan pa haya sa kico ta pasando. E ora ey e victima a bisa cu ta un amigo. A.D. a bisa Hues cu el a papia cu e amigo via facebook, pa no mete den nan asunto y laga nan trankilo.

Hues a puntra si A.D. a rabia. Segun A.D., e no tabata rabia y hasta nan a bay haci compras. Nan tabata papia cu otro normal sin papia riba e asunto di e amigo. Hues a puntra si e victima a bis’e cu e ta interesa den un otro homber y no kier nan relacion sigui. Segun A.D., e victima a bisa cu e no conoce e homber ainda y no a bis’e cu e relacion a caba. El a conoce via Facebook. Hues a bisa cu e por a compronde cu tabatin problema pa cu e homber aki. A.D. a manda un mensahe pa e homber riba facebook y a bisa pa laga su famia na paz.

   DISCUSION A BAY FOR DI MAN:

Diamars 23 April 2019, A.D. a sali for di su apartamento cas na Zeewijk pa bay cerca su yiunan y e victima na San Nicolas. Ta un distancia basta largo. Na caminda el a cumpra coy come pa asina comparti cu su famia. Na dado momento el a mira un mini Van pasa banda di dje y el a reconoce e homber cu el a mira riba facebook. E mini Van a bay den vecindario di e cas di e victima y A.D. a mira su yiu homber bay na e Van y despues e victima.

   DISCUSION A BAY FOR DI MAN:

Segun A.D., e momento ey el a sinti cu e victima tabata gaña. E tabata kier sa e berdad. El a bay na e cas y a bay den camber unda e victima tabata. Su yiunan tabata pafor. Ora el a bisa e victima cu el a mira e victima na e auto. E victima a keda desmenti cu no ta asina. Na dado momento e victima a bira agresivo. A.D. a bisa e victima cu e tabatin relacion cu e homber. E victima a dal’e dos biaha wanta den cara y e momento ey A.D. a choca e victima. Nan a cay entre dos cama. E yiu muher a drenta den camber y mira kico tabata pasando. E mucha a bisa A.D. pa laga su mama bay. Segun A.D., e momento ey e victima tabata scumando. A.D. a bisa cu el a bira panico y no tabata sa kico pa haci. Segun A.D. el a fula pols di e victima y e tabata sinti pols pero e victima no tabata move. El a skirbi number di telefoon riba un papel pa e yiu muher yama ruman muher di e victima manera cu e sali bay. El a bisa cu el a spanta y el a sali core bay te ora el a yega na su apartamento na Zeewijk. Riba facebook el a mira cu e victima a fayece.

    YIU TA MIRA TATA MATA SU MAMA:

Hues a bisa cu A.D. su declaracion na Polis tabata diferente. El a mustra cu ora el a yega den e camber, el a mira e victima tabata manda mensahe riba cellular. Ora el a mira A.D. el a spanta y A.D. a pidi pa e cellular. E victima no tabata kier. A surgi un luchamento pa e cellular pasobra A.D. kier sa cu kende e tabata papia. Hues a mustra cu e yiu muher a bisa cu el a gara su tata pa laga su mama los. E mucha a bisa A.D. pa laga su mama los sino e no ta papia cu A.D. mas. E ora ey A.D. a laga e victima los y a bolbe choca. E mucha a bisa cu ora su mama a keda drumi abao for di tino, su tata A.D. a bis’e pa warda 10 minuut y despues yama e ruman muher y cu A.D. ta bay Polis. E mucha a bisa cu A.D. tur dia tabata rabia y cu su mama no tabatin un otro amigo. El a bisa cu A.D. a bisa su mama cu e lo bay mira kico ta pasa cun’e y e homber.

A.D. a desmenti cu e tabata rabia y cu el a menaza e victima. Hues a bisa cu e ruman muher di e victima a bisa cu 22 April 2019, un dia promer cu e lamentable incidente, A.D. a bay na e cas y a menaza e victima. Hues a remarca cu tur hende rond di A.D. tabata bisa cu A.D. tabata rabia pero A.D. mes ta bisa cu e tabata trankil. Hasta un amigo di A.D. a declara cu A.D. tabata hopi nervioso pa e relacion cu e victima.

Hues a remarca cu ta straño cu diripiente A.D. a rabia asina. Segun A.D., tur cos a pasa asina liher cu e mes no tabata sa kico e tabata haci. Hues a remarca tambe cu A.D. a fula pols pero no a yama ambulance. A.D. a bisa Hues cu e tabata den panico y no a pensa esey.

Fiscal a remarca cu e ta sorprendi cu e declaracion di A.D. den Corte. Fiscal a bisa cu e yiu muher a bisa cosnan con A.D. a choca su mama. Segun A.D. su yiu no a bisa e berdad. E no sa pakico e mucha a bisa ainda. Por ta, ta e famia di e victima a hinca cos den su cabez. E momento ey por a scucha e famia di e victima a reclama. Fiscal a remarca pakico A.D. a skirbi number di telefoon y no a yama ambulance. Segun A.D. esey tabata e unico cos cu a pasa den su cabez e momento ey.

   NO TIN PROBLEMA MENTAL:

E raport psycologo ta mustra cu A.D. no tin problema mental. Si cu emocional A.D. no ta stabil. E psycologo ta haya cu A.D. ta responsabel pa loke el a haci. E psycologo ta conseha A.D. haya guia Reclasering y pa controla agresividad. Psychiater tambe ta haya cu A.D. no tin problema mental.

Hues a puntra A.D., con ta bayendo awor cu e ta sera den KIA. A.D. a bisa cu e tin 11 luna sera y cu e caso ta traha riba dje y cu no tabata su intension pa a mata. El a bisa cu su yiunan no ta bishit’e den KIA. Su famia si pero no famia di su victima. El a pidi dispensa na famia y su yiunan. Esaki tabata un momento hopi emocional. E famia tabata yora den sala di Corte. A.D. cu wowo yen di awa a bisa cu e famia sa kico tur tabata pasa.

   DEMANDA DI DAÑO:

E famia di e victima a demanda algo mas di 15 mil Florin. Esaki ta encera gasto di entiero, alimentacion pa e muchanan pa 1 aña, placa escolar, cumpra camanan pa muchanan. E rumannan awor a tuma e muchanan y no tabatin cama na e cas. Hues a puntra pakico no a acerca Voogdijraad pa alimentacion.

Nan splica cu tin un proceso andando pa tin autoridad riba e muchanan. A.D. a bisa Hues cu e kier paga pero actualmente e no ta trahando.

 

- Advertisement -

DUNA COMENTARIO

Please enter your comment!
Please enter your name here