Home General Movie Night den Caya Betico Croes tabata exitoso

Movie Night den Caya Betico Croes tabata exitoso

79
0
SHARE
- Advertisement -

ORANJESTAD (AAN): Diabierna ultimo un biaha mas AREA a organiza un ‘Open Air Theater Movie Night’ pa comunidad den centro di ciudad Caya G.F. Betico Croes.

E evento gratis aki a tuma luga pa celebra dia di San Valentin den un ambiente unico. E ‘Valentine’s Day Movie Night’ aki a resulta den un anochi sumamente exitoso, unda cu por a conta cu presencia di un multitud di hende, y hopi reaccion positivo.

AREA ta un iniciativa cu a worde lansa den aña 2018 door di Gobierno di Aruba y ta carga door di Futura cu ta Aruba su Lab di Innovacion Nacional. E meta principal di AREA ta pa trece bida back den nos centronan di ciudad, y e enfoke den e ultimo añanan ta riba San Nicolas y Oranjestad.

Pa cumpli cu e meta aki, AREA ultimamente ta buscando maneranan creativo pa trece un fluho di hende den nos centronan di ciudad. Y den cuadro di esaki iniciativanan manera e pop-up ‘Open Air Theater’ ta worde purba.

Na december 2018 a test e concepto aki pa prome biaha riba Plaza Daniel Leo, sigui pa un di dos ‘Open Air Theater’ den Caya G.F. Betico Croes december ultimo. Como cu e feedback ricibi tabata sumamente positivo, a dicidi di continua esaki, resultando den e ‘Valentine’s Day Movie Night’ exitoso di diabierna ultimo.

DIARIO a haya sa cu AREA ta determina pa continua cu e iniciativa aki, como cu ta di sumo importancia pa tin diferente tipo di iniciativa pa grandi y chikito, durante henter aña. Asina aki nos por mira un fluho mas grandi di hende bishitando nos centro di ciudad.

Por medio di diferente sondeonan haci, a resulta cu nos comunidad ta desea pa tin mas iniciativanan asina aki, combina cu por ehempel anochinan di compra.

Hunto cu e comerciantenan den nos centro di ciudad, AREA ta determina pa sigui cu diferente evento, y ta invita pueblo en general pa sigui e pagina di Facebook ‘Oranjestad AREA Events’ pa keda na altura di eventonan den y rond nos centro di ciudad.

 

- Advertisement -

DUNA COMENTARIO

Please enter your comment!
Please enter your name here