Home Hudicial Guarda Costa a persigui y tira riba boto cu a caba di...

Guarda Costa a persigui y tira riba boto cu a caba di baha 10 ilegal banda di Baby Beach

962
0
SHARE
- Advertisement -

Fiscal a exigi 1 aña di prison pa dos den e boto

ORANJESTAD (AAN): Un persecusion di un boto cu a caba di tres 10 ilegal Aruba, a caba ora cu miembronan di Guarda Costa a tira riba motor di e boto. Esaki a sosode pafor di awa territorial di Aruba. Discusion den Corte entre abogado mr. Crouch y Fiscal riba cu mester declara Fiscal no admisibel pasobra mester a pidi permiso na autoridad Venezolano. Fiscal ta mustra cu segun tratadonan internacional, ora cu a cuminsa un persecusion den awa territorial di Aruba esaki ta sigui te ora cu e caba y no mester pidi permiso.

ACUSACION

E hombernan Venezolano C.R. y X.M. a presenta dilanti Hues y Fiscal a acusa nan di traficacion di hendenan ilegal for di Venezuela riba 1 November 2019 anochi. Fiscal a mustra cu e boto no tabatin radio, salba bida, equipo di navegacion y tampoco luz cu ta pone bida di hendenan na peliger.

TIRA RIBA BOTO

Hues a mustra cu Guarda Costa a haya informacion cu tin un boto for di Venezuela direccion Baby Beach cu velocidad halto. Ariba radar for di Curacao a mira esaki. Pa 11.30 di anochi Guarda Costa a mira e boto sin luz. A sende lus y sirena pero e boto a sigui navega. A los tiro di advertencia pero nan a sigui. E ora ey miembronan di Guarda Costa a tira riba motor di e boto y asina esaki a logra para. Den e boto tabata C.R. y X.M.

BAHA ILEGALNAN NA ARUBA

Durante interogacion C.R. y X.M. a bisa miembronan di Guarda Costa cu nan a caba di baha 10 hende banda di Baby Beach. E ora ey a haya sa cu ta traficacion di hende. Nan a bisa cu a trece hendenan for di Venezuela y tabata bayendo bek. Ora nan a scucha un otro boto banda di nan, nan a kere cu ta boto pirata y no kier a para. Ta ora a scucha tiro a para. X.M. a bisa cu e lo haya 200 dollar. E ta kere cu e hendenan lo a paga entre 200 y 350 dollar pa nan viahe pa Aruba. Un tal Roberto lo a acerca X.M. y C.R. pa haci e navegacion pa Aruba. Segun X.M. el a haci esaki pa placa pa mantene su famia. Tabata promer biaha cu el a haci esaki. Segun X.M. e tabata dilanti den e boto y C.R. tabata patras ta stuur. Segun X.M. den e boto tabatin 10 salbabida. Hues a remarca cu Guarda Costa a constata cu no tabatin salbabida. X.M. a bisa cu a baha e hendenan den seco cu nan no mester a landa. Cada un tabatin un salda bida bisti. C.R. tambe a bisa cu el a trece e hendenan y cu e lo haya 200 dollar. El a splica cu e hendenan for di Venezuela a haya e salba bida pa bisti.

EXIGENCIA DI FISCAL

Fiscal a bisa cu e ta haya legalmente proba cu e duo a trafica hendenan ilegal. Nan a admiti di a transporta e hendenan y tabata den un boto sin luz. E pregunta ta si a pone bida di e otronan na peliger. Nan ta bisa cu a duna e hendenan salba bida. Na opinion di Fiscal, e forma con nan a splica ta pone cu por kere cu e hendenan tabatin salba bida. Pero si mira e grandura di e boto, ta hopi peligroso pa tin 12 hende abordo. No tin radio, no tin pistol di señal, no tin luz, no tin sistema di navegacion. Tur esaki ta haci cu a pone e hendenan nan bida na peliger. Fiscal a mustra cu den pasado a yega di sosode tragedia caba. El a bisa cu cruza e laman grandi entre Venezuela y Aruba ta sumamente peligroso sin tin tur e aparatonan menciona. Fiscal a sigui bisa cu traficacion di hende ta sosode hopi na Aruba. Door di e situacion na Venezuela, hendenan ta busca manera pa bin Aruba pa haya trabao. Ademas di hende, tin contrabanda di arma y droga. E hendenan ilegal ta bin Aruba y ta traha ilegal y ta keda den e circuito ilegal. Esaki ta causa hopi presion pa Aruba. Fiscal a exigi 12 luna di prison y cu e boto ta keda confisca.

DEFENSA ABOGADO

Mr. Crouch a bisa Hues cu segun Guarda Costa, e boto a wordo para den awanan territorial di Venezuela. E no ta haya cu tin autoridad pa para e boto. Guarda Costa tabata sa cu ta un boto Venezolano. E abogado, refiriendo na sentencia di Corte na Curacao relaciona cu persecusion di boto, ta haya cu a base di e sentencia no por a para e boto. El a mustra cu Guarda Costa a reconoce e boto cu e ta Venezolano. Si no tabata asina, ta otro asunto. E abogado ta haya cu mester declara Fiscal no admisibel. E abogado ta haya cu Guarda Costa no a pidi autoridad Venezolano permiso pa para e boto.

E abogado a sigui bisa cu e duo ta desmenti cu a pone bida di e hendenan na peliger. Tur e hendenan tabatin salba bida bisti. Nan a haci e viahe no pa haci ganashi sino pa gana placa pa por sobrevivi na Venezuela.

Hues a mustra cu segun e raport di Guarda Costa, door cu e comunicacion no tabata bon, a realisa cu nan tabata den awa territorial di Venezuela y cu e boto tabata un Venezolano.

Fiscal a bisa Hues cu e investigacion a cuminsa den awa territorial di Aruba. A base di tratadonan internacional, Guarda Costa a cuminsa un persecusion y cu nan tabatin autoridad pa caba cu e persecusion. Aki no por papia cu mester a pidi permiso.

Hues a sera tratamento di e caso y a bisa cu dia 20 Maart 2020 pa 8.15 lo tin sentencia.

 

- Advertisement -

DUNA COMENTARIO

Please enter your comment!
Please enter your name here