Home Religion y Espiritualidad Comision di Vaticano a aproba e prome milager di dr. José Gregorio...

Comision di Vaticano a aproba e prome milager di dr. José Gregorio Hernández

40
0
SHARE
- Advertisement -

ORANJESTAD (AAN) – Fundacion Venerable Jose Gregorio Hernandez ta participa cu mas of menos un luna pasa, Vaticano a aproba e prome milager comproba den su totalidad di dr. Jose Gregorio Hernandez. Esaki Victor Hugo Basabe, obispo di San Felipe y administrado apostolico di Barquisimeto a informa.

“E comision di dokter di e Congregacion pa causa di Santo, a aproba e milager cu dr. Jose Gregorio Hernandez a realisa. Awor ta riba caminda pa beatificacion di dr. Jose Gregorio Hernandez. Alaba sea Dios cu ta mira nos cu amor”, obispo Basabe a expresa.

Segun e protocol di Iglesia Catolico, ta considera un homber of un muhe Siervo di Dios y Venerabel prome cu e bira Beato, algo cu por haya solamente si comproba un milager.

Den e ultimo paso di canonisacion, ta considera e beato santo. Ora esaki tuma luga, Iglesia Catolico ta duna permiso pa rindi culto publico y ta asigna un fiesta liturgico, cu pa regla ta e dia cu e esun nombra santo a fayece.

Tempo cu dr. Hernandez tabata na bida, el a dedica su mes na e causa di esnan mas pober y nan ta record’e pa su caridad y generosidad. Na Venezuela y paisnan bisiña nan ta consider’e santo, na kende nan ta atribui hopi milager medico no comproba.

El a nace dia 26 di october 1864 na Isnotu, estado Trujillo y el a fayece na Caracas dia 29 di juni 1919, ora un auto a dal e, el a cay y a fractura su craneo. Na 1986 Papa Juan Pablo II a declar’e Venerabel.

E caso di e milager di dr. Jose Gregorio Hernandez tin cu pasa pa comision di teologo y cardinal. Si tur dos aproba esaki, lo falta e aprobacion di Papa Francisco pa nombr’e beato.

Den un conferencia tocante bida y obra di dr. Hernandez, cu nan a presenta na Universidad Lateranense di Roma na october 2019, e cardinal Italiano, Pietro Parolin a sigura cu dr. Jose Gregorio Hernandez ta un signo di speransa pa pueblo.

Cardinal Baltazar Porras, arsobispo di Merida y administrado apostolico di Caracas a agrega, cu dr. Jose Gregorio Hernandez ta e figura di e bon homber cu por unifica e Venezolanonan. E cardinal aki ta considera cu dr. Jose Gregorio Hernandez ta un modelo di bida cristian.

Pueblo, laga nos sigui resa y pidi Dios pa Beatificacion di dr. Jose Gregorio Hernandez.

Den un otro articulo, nos Fundacion lo elabora riba e milager mes cu a sosode na 2017!

- Advertisement -

DUNA COMENTARIO

Please enter your comment!
Please enter your name here