Home Carnaval Carnaval: Bomberonan cu suplica na chauffeurnan pa no laga auto staciona den...

Carnaval: Bomberonan cu suplica na chauffeurnan pa no laga auto staciona den caminda

421
0
SHARE
- Advertisement -

ORANJESTAD (AAN): Ni maske cuanto biaha ta haci suplica na ciudadanonan, toch tin algun chauffeur cu ta sigui comete e infraccion y no ta preocupa cu nada.

Aki DIARIO ta referi na chauffeurnan cu keto bay ta blokea salida y entrada di algun cruzada importante pa personal di Emergencia na Aruba.

Ferdinand Ponson kende ta vocero di Cuerpo di Bombero, a splica cu keto bay tin algun chauffeur cu no ta preocupa cu nan ta blokea caminda, y ta bay laga nan auto eynan na lock y ta bira obstaculo.

E suplica ta pa pueblo para auto na e mihor manera.  Pa colmo tin algun chauffeur cu kier para lo mas cerca posible pa mira Parada di Carnaval.  Djis percura pa bo no stroba Brandweer y Ambulans.

Tin varios cruzada cu semper bo ta mira trucknan di Bombero y Ambulans para pa cualkier emergencia, e.o. Vondellaan y Madurostraat.  Tambe ta mira Ambulans na Fort Zoutman y tambe Schuttestraat.

Djis corda riba e caso lamentable cu un turista den piscina di un Hotel.  Net e momento ey e cruzada tabata blokea, y Ambulans no por a yega.  Finalmente e Paramediconan mester a baha y na pia core yega na e lugar.

Pero si acaso ta un candela?  Eynan si Bomberonan so no por bay na pia, pasobra nan tin di bay cu nan vehiculo pa yuda paga candela.  Esaki ta trata na evita, y tur aña ta haci un suplica na chauffeurnan.  Incluyendo e area patras di Parlamento y den Playa.  Bo mester para bo auto bon, pues no bay blokea un cruzada, of para na e rand di caminda, di tal forma cu e truck no por haci un birada drechi pa yega na un emergencia.

E idea ta pa cierto caya di acceso keda cera, pero e acceso ta hancho habri pa Ambulans y Brandweer.  Mirones kizas por staciona nan auto na banda/acera, pero e parti mey-mey tin di keda habri.

Na altura di Renaissance Marketplace, cu ta e Mall banda pazuid di e ruta, lo tin di bay percura cu ningun auto of vehiculo ta blokea ambos banda di caminda.

Ta pidi chauffeurnan purba laga espacio mey-mey di Shakespearestraat, como tambe e caya patras di Talk of The Town.  Di e forma ey trucknan di Bombero por pasa trankil si acaso candela presenta den e bario.

 

- Advertisement -

DUNA COMENTARIO

Please enter your comment!
Please enter your name here