Home Gobierno AVP a pone cu cada siman pueblo tin di paga 1 miyon...

AVP a pone cu cada siman pueblo tin di paga 1 miyon Florin pa core riba Watty Vos Boulevard

583
0
SHARE
- Advertisement -

ORANJESTAD (AAN): Tur wowo ta riba e resultado di un rapport cu a sali, y ta pinta un imagen espantoso di e forma con Gobierno di AVP for di aña 2010 te cu 2016 a traha riba 241 proyecto, y e costo di esaki a yega na 1.6 biyon Florin.  Y esey ta placa cu Aruba no tin.

Contraloria General di Aruba a emiti e “Rapport BO Aruba” cu a haci un investigacion riba e forma cu den e seis añanan ey a crea 241 proyecto sin cu nan tin cobertura, cu riesgo negativo, y sin cu a check e consecuencianan financiero pa Aruba.

Diaranson mainta tabatin un reunion den Parlamento pa asina trata e seriedad di e rapport aki, y e puntonan asombroso cu a ser descubri aden.

Ministro di Finanzas mr. Xiomara Maduro, tambe a hiba palabra pa contesta preguntanan.  El a mustra con na tres ocasion, Contraloria General a pidi ex-Ministro di Infrastructura pa duna opinion riba rapport aki, y e Ministro nunca a duna un opinion, mustrando su mala fe.

Pasobra AVP a gasta placa di pueblo, den proyectonan cu awe tey cu costonan astronomico cu ta pone e ora un presion grandi riba finanzas publico, y lo mas tristo ta cu a usa pa proyectonan PPP cu contratistanan internacional, y awor cu ta wordo confronta cu e pago, e placa aki no ta keda pa lora economia.  E placa ta bay pa lora otro economianan den exterior.  Y esey ta hopi tristo.

“Paga ta algo, pero tristo ta cu e placa aki ta bay afo y no ta keda na Aruba,” Ministro a bisa.

Pesey tin mas asunto pakico ta importante pa Parlamento a yama e reunion, como cu tin mas cos cu ta mustra cu tin falta di respet pa e ex-Ministronan aki cu no kier duna cara na Contraloria General.

Ministro recien a mustra riba loke el a yama “Lama di debe di gasto”.

El a splica cu aworaki, pa siman pueblo ta paga riba 1 miyon Florin pa core riba Watty Vos Boulevard.   Pues 1 miyon for di placa di belasting di pueblo, ta bay tur siman pa paga pa core riba dje.

E debe di Watty Vos Boulevard lo finaliza na aña 2040.  E debe di renobacion di Hospital lo finaliza na 2044.  E debe di caretera di Green Corridor lo finaliza na 2037.

Aworaki na aña 2020 a cuminza paga 82,4 miyon Florin na Proyectonan PPP.

Pero algun hende di AVP a keda cu Gobierno di MEP tambe a yega di bin cu PPP.  Ministro mr. Maduro a confirma esey, pero el a bisa cu e proyectonan PPP di MEP tabata apenas 9 miyon Florin.

Awor hunto cu esnan di Gobierno di AVP, el a bira 82 miyon Florin.

Pa e proyecto MFA Paradera, Noord, Savaneta y Santa Cruz, tambe Centro di Husticia na Macuarima, Warda di Polis na Shaba, InfraGebouw y edifico di Belfin, Aruba ta paga un total di 82,4 miyon Florin.

Ministro a splica cu e suma di 82,4 miyon pa aña lo page di 2020 te 2030 e suma flat, djey e ta baha un tiki pa sigui paga te na 2044.

Pero algun luna pasa, Contraloria General a bin cu un otro rapport, unda nan ta adverti cu ora cu Gobierno di AVP a firma e contract pa PPP pa traha Watty Vos Boulevard, tabatin un clausula espantoso poni den dje.

A sali na cla, cu den e contract cu AVP a firma, ta poni cu si acaso Aruba faya den e credibilidad financiero (pues si rating di Aruba baha), e ora e debe aki cu ta relata na Watty Vos Boulevard mester wordo paga na un forma acelera.

Si acaso esey socede, Ministro ta adverti cu por si acaso e rating di Aruba cay, e lo nifica cu mas cu claro, e presion financiero ta bira mas grandi, pues pago di 82 miyon Florin ey pa aña, lo bay subi aun mas!  Pues ta mira con Gobierno di AVP a hipoteca futuro di tur hende riba e isla.

- Advertisement -

DUNA COMENTARIO

Please enter your comment!
Please enter your name here