Home Cultura Avalancha di critica y hasta grito di boycot pa Arubadag 2020

Avalancha di critica y hasta grito di boycot pa Arubadag 2020

5405
0
SHARE
— Arubianonan na Hulanda sorprendi cu Le Groove lo no tey.
- Advertisement -

ORANJESTAD (AAN): Nunca antes den historia por a nota asina hopi critica, zundramento, y hasta yamada pa tene un boycot contra e evento di Arubadag 2020 cu lo tuma lugar otro luna na Rotterdam, Hulanda.

Tabata Diahuebs alrededor di 8:00 am (ora di Aruba) cu e organizadornan na Hulanda a pone oficialmente nan line-up di e aña aki di e evento cu lo tuma lugar dia 29 di Maart 2020 den Rotterdam Ahoy.

— E poster oficial.

Nan a anuncia cu lo tin Popcorn Dancers, Gran Dama Cultural Jesseline Winklaar-Odor, Grupo Stimami, On Time Music (consistiendo di Jeremy Garcia y Aymar Torres), Roots Palmera, Steve Andreas, Karixon, Sky, Ataniro, tambe e grupo A Tribute to Musical Time, Soca vs. Dancehall, Buleria, y como invitado special, e grupo popular di Hulanda di hip hop, esta ‘Broederliefde’.

A skirbi tambe cu a manda invitacion pa Caiso Monarch, Soca King, Rey di Tumba, y tambe Rey di Dande y nan ta sperando nan confirmacion.  Tambe nan lo invita e ganador di Festival Un Canto na nos Himno y Bandera.

Unavez cu esaki a sali publica, el a causa un sorpresa grandi cerca publico.  Hopi di nan desapunta cu ningun  grupo grandi y popular di Aruba lo no tey.  Aunke a mustra cu Buleria si lo bay tey, e publico a reacciona bisando cu ya nan ta mirando Buleria ya hopi biaha caba na Hulanda. Ta conoci cu Buleria mes hopi biaha ta cubri su mesun gasto pa bay Hulanda.

Un rato despues, e Soca King di 2020, esta Antoni Gario a revela cu el a nenga e invitacion.  El a splica cu e invitacion ricibi tabata pa e so bay como individuo.  “Como Rey di Soca 2020 y cu un acogida aplastante, lo mi kier deleita mi pueblo aya na Hulanda cu mil amor,” el a pone riba su media social.

“Sinembargo, mi a train, mi a toca, y mi a gana cu Le Groove!  Pues si acaso no tin posibilidad pa mi banda acompañami, lo mi tin cu rechaza e invitacion. Cual mi a haci di inmediato pa no perde Gobierno su tempo,” Gario a bisa.

Pero pa e momento ey cu el a duna su declaracion, ya caba publico mes tabata reacciona full sorprendi riba e anuncio di organizadornan di Arubadag 2020.  Hopi a skirbi e reaccion cu nan ta “desapunta”.

Nan ta desapunta cu pa e evento aki, no a manda busca ningun banda popular di Aruba, nada di Tsunami, nada di Le Groove, nada di Youth Xtr3me.  Nan ta yamando e line-up di 2020 como un ‘joke”.

   BROEDERLIEFDE:

Por a nota con Diahuebs, un monton di Arubiano na Hulanda a reacciona sorprendi cu a dicidi pa gasta un dineral pa pone e grupo di hip hop ‘Broederliefde’ bin toca na Arubadag.  Un grupo cu tin nada di haber cu Aruba.

Pa colmo, reaccionnan di e Arubianonan na Hulanda ta mustra cu e presentacion di ‘Broederliefde’ den Arubadag 2020 lo bay trece e ‘publico robez’ den e evento aki.  Ademas, ki ora cu ta bo por acudi na un evento di ‘Broederliefde’ na events na Hulanda mes.  Nan a keda ripiti bisando cu e grupo di Broedeliefde tin nada di haber cu cultura di Aruba.

E Arubianonan na Hulanda a sigui expresa cu e anuncio di e gruponan aki, a daña full e Arubadag cu nan ta costumbra cune.  Nan semper tabata mira Arubadag como un oportunidad unico pa sikiera 1 dia largo por goza di gruponan popular di Aruba.

Hopi tabata kere cu porfin e aña aki nan lo a bay haya Le Groove pa bin deleita e gran fanaticonan Arubiano na tera frieu, pero a keda desapunta.

Nan sa cu Aruba tin hopi bon agrupacion, y di con semper ta sigui hiba e mesun hendenan.  Pa colmo den weekend cu a pasa, tabatin hasta hendenan cu a cuminza pidi pa manda busca Youth Xtr3me pa Arubadag, pasobra nan tambe kier show off con ta balia “Boom Bam” na Rotterdam.

Manera ta conoci, “Boom Bam” a bira un hit instantaneo na Aruba den Carnaval 66 y a hasta duna Youth Xtr3me e titulo di Roadjam 2020.

  BOYCOT:

E reaccion di publico di Aruba residencia na Hulanda, como 1 ora despues a cambia y a bira den gritonan pa tene un ‘boycot’ completo pa evento di Arubadag 2020.  Varios persona a insisti cu nan a tuma decision caba cu e aña aki nan lo keda nan cas, y no acudi na Rotterdam Ahoy pa e evento.

Claramente por mira cu e reaccionnan aki na monton, ta demostra cu publico di Aruba a keda desapunta cu e lineup.  “Boso cuminza trece banda drechi for di Aruba y no tur ora mesun banda, jammer”.

Varios persona a keda sorprendi cu tin hopi placa pa busca Broederliefde pa duna actuacion, pero no tin placa pa busca e bandanan di berdad cu Arubianonan na Hulanda ta desea pa mira y balia den Arubadag.

Y keto bay e mensahenan pa “Boycot” a cuminza resona, como tambe e reaccion di “Belachelijk” pa e line-up aki.   Ta parce cu e comision organizador di Arubadag ta realmente “out-of-touch” cu publico Arubiano na Hulanda, y di berdad no tabata sa kico nos hendenan kier scucha na e evento?

“Tanten cu e Arubiano keda aporta na programanan di Arubadag cu e Arubiano “no kier”, Gobierno lo sigui pone programanan den otro cu ta beneficia nan den tur sentido di palabra, ami Rey di Soca 2020 ta lamenta e realidad tristo y contra boluntad di pueblo di Aruba aki,” Antoni Gario a expresa Diahuebs mainta.

El a finaliza bisando: “Cu hopi tristeza den mi curazon, pero cu honor na mi palabra como Rey, mi lo no tey [na] Arubadag!”

Tin hende cu a duna indicacion cu posiblemente e aña aki e ‘presupuesto’ pa organiza e evento aki ta tiki limita.  Sinembargo e momento cu nan a mira cu toch tin placa pa Broederliefde duna un show, esaki mesora a bari e hipotesis ey for di mesa.

- Advertisement -

DUNA COMENTARIO

Please enter your comment!
Please enter your name here