Home Carnaval Un eleccion maratonico di Reina di Carnaval cu a dura 8 ora

Un eleccion maratonico di Reina di Carnaval cu a dura 8 ora

126
0
SHARE
- Advertisement -

ORANJESTAD (AAN): Diadomingo madruga pa exactamente 3:06 am, porfin Aruba a haya sa kende a bira su Reina nobo di Carnaval.  Esaki a socede despues di un anochi maratonico den Aruba Carnival & Entertainment Village na San Nicolas.

Pa prome biaha den historia, a dicidi na pone tanto eleccion di Reina Infantil, Reina Hubenil, Señora Carnaval, y tambe Reina Grandi hunto riba un solo fecha.  Y nan a pone e show start pa 7:00 pm.

A organiza e evento cu e palabracion, cu e anochi lo start prome cu Eleccion di Reina Infantil.  Esey ta encera pues e presentacion inoficial cu discurso, tambe e parti oficial cu show, sigui pa despedida di reina saliente, y bin cu resultado prome.

Esaki a ser haci pa asina coopera pa muchanan por keda cla trempan.  E maestronan di ceremonia tabata George Winterdaal, Mehsen Labadie, y Shaqayli ‘Shiki’ Ascencion, y nan a haci un fenomenal trabao.

Sinembargo yobida sporadicamente henter anochi parce ta loke a trece dificultad tecnico riba escenario, unda na varios ocasion show a wordo para y cuminza di nobo.  Toch tabatin hopi mas factor cu a pusha e show, y pone cu te despues di 10’or di anochi a anuncia ganadora di Reina Infantil, den persona di Jo-Amy Morcillo di Noord.

E ora numa a start cu e siguiente parti di Reina Hubenil, Señora Carnaval y Reina Grandi.

Esnan cu a kere cu kizas banda di 12’or nan lo keda cla cu tur cos, tabata bon ekiboca.  E show a keda rek y sigui rek, y asina 1:00 am a pasa, 2:00 am a pasa.

Despues un caso lamentable a socede den area patras di escenario, unda un dama laborando e anochi ey na e lugar a cay den otro y fayece.  Den otro noticia den DIARIO awe por lesa di e caso ey.

No obstante e caso ey, un poco prome cu 3’or a cuminza anuncia e nombernan ganador.  Reina Hubenil a bira Alysa Simon di Kiwanis Builders Club.  Señora Carnaval a bira Neiffi Kock-Sierra di Infinity Carnival Group.  Reina Grandi a bira Rudyanne Lejuez di Champagne Carnival Group.  Nan a saca su nomber pa 3:06 am.

   RECLAMO DI PUBLICO:

Tabatin reclamo den seccion di publico tambe, cu nan a wordo “teni” masha leu mes for di escenario.  Pa colmo tin un pantaya grandi cu ta mustra imagen di videoplayback, pero nada di un imagen directo en vivo pa publico para patras por mira cara di e candidatanan riba stage.

E seccion di VIP tambe a wordo hala basta leu di escenario.  Y esaki a bin debi cu e mesa di hurado tabata hopi largo, cu riba di 10 hurado, y nan curpa a stroba tur bista di hendenan den VIP.

      BAR OUT OF STOCK:

Algo cu a wordo reclama e madruga ey mes, ta cu for di banda di 2:00 am caba, tur hende cu tabatin sed ya no por a haya nada mas di bebe.  Aparentemente e stock di Bar a caba.  Y e otro bendedornan di cuminda, aparentemente no tabata por a bende bebida.

Ta di compronde cu e eleccion a bay extra ora largo y kizas nan no tabata prepara pa a prepara suficiente stock.  Pero publico no a gusta cu stock a caba.  Hendenan cu sed mester a keda warda te ora cu nan yega cas.

Algun di e fanaticonan ferviente tabatey for di 5’or di atardi caba na Aruba Carnival & Entertainment Village.  Pues nan a cumpli 10 ora riba pia eynan.

   BUNITA STAGE:

Algo cu si a haya bon comentario tur caminda, ta e bunita escenario cu a wordo crea na Aruba Carnival & Entertainment Village.  E efectonan di truss poni di banda, cu light-effects riba nan, tabata agradable pa bo wowonan.

Aunke tabatin spotlight constant riba e candidatanan, toch algun hende a desea pa a mira mas luz blanco riba demas parti di escenario pa asina por mira mas di e beyeza di e demas bailarinnan dunando show.

DIARIO a compronde cu e show a sigui te 3:00 am, y ningun reclamo a bin di bisiñanan encuanto sonido, compara cu ora e evento aki ser teni na otro barionan.  Ey bo ta mira cu e amor pa Carnaval y Musica ta grandi di berdad na San Nicolas.

- Advertisement -

DUNA COMENTARIO

Please enter your comment!
Please enter your name here