Home Policial Pueblo henter a condena acto di vandalismo na Cacique Macuarima School

Pueblo henter a condena acto di vandalismo na Cacique Macuarima School

531
0
SHARE
- Advertisement -

Candela a destrui como 4 lokaal

ORANJESTAD (AAN): Tabata Dialuna algo despues di 12’or di madruga, cu un agente policial den area di Macuarima a haya holor di huma.  A bin resulta cu huma ta saliendo di e scol basico di Cacique Macuarima School.

E scol aki ta situa como 450 meter pariba di Centro di Husticia na Macuarima.

Inmediatamente tanto Polis como tambe Cuerpo di Bombero a mobiliza pa e area y enberdad a bin topa cu un ‘uitslaande brand’ na e scol aki.

Tabatin candela grandi den dos klas, y tambe por a nota huma ta sali for di otro dos klas mas.  For di prome momento a cuminza sospecha cu e ta trabao di un piroman, como cu a haya un di e bentananan kibra.  Ta via e bentana kibra aki nan lo a drenta den klas, y haci cos for di sla.  Usando verf di bleki di spuit, nan a hasta pone mensahenan bulgar y tambe den forma di haci bofon di Polis.

E candela mes a destrui tur material den klas, incluyendo lessenaar di docente, di alumnonan, y tambe equipo electronico manera Digiboard, inside unit di Airconan, y plafond.  Tur material den cashinan a bay perdi.

Autoridad ta bay investiga tur rastro cu por haya eynan, incluyendo e forma di skirbi graffiti.  For di trempan caba tin personanan cu ta convenci cu ta teenagers lo a comete e candela aki.  Algun ciudadano den vecindario cu tin Security Video Camera, a bay revisa nan grabacion y aparentemente Recherche awor ta dispone di grabacion unda bo ta mira con hobennan di kizas 15 pa 16 aña ta esnan cu a comete esaki.

Riba Social Media tabatin algun hoben cu a skirbi cu ta un grupo conoci como “Santa Cruz Soldiers” lo ta responsable, pero e post ey despues a wordo kita.  No obstante tur esaki, Recherche tin e caso bao investigacion.

   CABEZANTE:

Ultimo temponan e scol tabata hopi den noticia, principalmente debi na e logro di docentenan y alumnonan, como tambe e sosten ricibi di Gobierno pa asina bin cu airco pa tur lokaal, y tambe cu e eLearning Pilot Project a bira realidad na Aruba y a cuminza prome na e scol aki.

Den lokaalnan e muchanan tabata haya les for di un Digiboard hopi costoco colga dilanti, unda antes tabatin djis e borchi di palo y krijt.

Cabezante di Cacique Macuarima School, esta Rachelle Croes-Caster a wordo avisa cu su scol ta na candela, y el a yega mesora.  Aki el a bin topa cu Bomberonan trahando y tanto Klas 6-B y tambe Klas 5-B tur na candela.

Pero e vlamnan a cuminza pasa via plafond, y ‘plama’ pa otro klasnan.  Segun cabezante, en total 4 klas a wordo afecta.  Entre nan tin dos klaslokaal di docentenan cu tin hopi aña dunando les eynan, incluyendo docente di Klas 6 cu tin 25 aña den servicio, y un docente di Klas 5 cu tin 39 aña di servicio.  Pues e tin materialnan di hopi aña compila, incluyendo detaye extenso di e historia di scol.

Esaki a pasa net cu docentenan cu semper ta hopi motiva y ta traha hopi duro pa scol, ta busca nan mesun material, ta bin den nan tempo liber durante weekend pa yuda prepara, pa e alumnonan haya bon educacion.  Awor ta tristo pa mira cu e materialnan no tey mas, e klas ta kima.

Tristo pa mira e bankinan ta kima y e alumnonan mes a perde tur nan material.  Esey ta e situacion mas fastioso.

Personal di NV Elmar a presenta madruga y a desconecta coriente pa asina Bomberonan haci nan trabao sin problema.  Esey nifica cu pa awor, e scol no tin coriente.

   HAYA 4 LOKAAL:

Inspectie di Departamento di Enseñanza como tambe Directora di SKOA a tuma e decision pa cera e scol henter e siman aki pa asina haya chens di traha riba e parti di coriente, fix e asunto cu si a keda bon.

SKOA mientras tanto a check cu algun otro scol, y a logra haya espacio y lokaal cu por ubica e cuatro klas temporalmente, pendiente di e trabao di reparacion.

Cabezante a splica cu ta bon mes cu e candela no a sigui expande, y e daño a keda na e cuatro lokaalnan aki so.  E ta contento na e agente policial cu a sa di haya holor di huma y a actua rapido segun su training.

Tambe ta agradecido na Bomberonan cu a yega basta rapido cu hopi truck, pa asina cuminza combati e candela.

Via Social Media, cabezante di Cacique Macuarima School lo keda mantene mayornan na altura di loke ta bay pasa, principalmente esnan cu tabata haya les den e lokaalnan afecta, y cu awor ta bay haya lesa na otro lugar.

Vandalismo no ta algo cu Cacique Macuarima School ta costumbra cune.  Segun cabezante Rachel Croes-Caster, e ta algo hopi inusual.  E scol ta uno hopi stima pa esnan di bario, maestronan, y alumnonan, y tin bon contacto cu bisiñanan, incluyendo ex-alumnonan.

E vandalistanan a laga mensahenan skirbi cu graffiti masha mahos palabra mes na muraya.

Investigadornan di Cuerpo di Bombero como tambe Bureau Forensico di BFTO a cuminza ta check tur detaye pa asina yuda autoridad hudicial den nan investigacion.

Cacique Macuarima School tin aseguro!  Segun e Cabezante a splica, cu aparte di esey, nan ta sumamente agradecido cu algun comerciante cu ya a manda bisa nan cu nan ta dispuesto pa contribui cu yudanza.

Comision di Mayor tambe a mustra cu nan ta preparando un reunion, pa asina duna yudanza pa check kico tin mester pa contribui na bienestar di e alumnonan.

Ta un tiki fastioso cu net muchanan di Klas 6 cu ta den proceso pa finaliza e scol y pa nan tuma e paso grandi pa escoge ta cua scol grandi nan lo bay awor.

Loke e vandalistanan aki a haci, a pone cu enseñanza ta haya nan ta bay gasta placa pa drecha un scol, envez di a usa e placa ey pa adelanto di otro programanan di educacion.

Algo ta sigur, cu pueblo henter a lanta Dialuna cu hopi disgusto, y cu mensahenan di desaprobacion pa loke e vandalistanan aki a haci.  Nan a kere cu nan lo haya hendenan ta sostene nan, pero ta henter pueblo a lanta brabo contra e atentado aki contra enseñanza.

Algun hende ya caba a pidi pa encarcela e malhechornan aki pa hopi aña.  Otronan a pidi pa laga e hobennan aki mes bay paga pa drecha tur lokaal, y laga nan mes bay haci e lugar limpi, pleister muraya, zaag plafond, y drecha tur cos.  Si acaso nan ta menor di edad, anto laga nan mayornan tambe carga e culpa financiero.

Cualkier persona cu por tin informacion di loke a pasa, ta ser pidi pa contact Tipline di Polis na 111-41.

- Advertisement -

DUNA COMENTARIO

Please enter your comment!
Please enter your name here