Home Policial Polis a bin topa cu un Uzi-Gun durante razzia na Arendstraat

Polis a bin topa cu un Uzi-Gun durante razzia na Arendstraat

608
0
SHARE
- Advertisement -

Pareha local considera hopi peligroso a keda deteni

ORANJESTAD (AAN): E tabata riba radar di funcionarionan hudicial pa algun tempo caba.  Sinembargo awor na Januari 2020, e pistanan a bira mas skerpi, y tanto Recherche y e asina yama Seccion Crimen Organiza di Cuerpo Policial a cuminza ta vigila mas y mas un area na Playa pa check movimento, y sigui busca informacion.

A base di nan propio observacion, y tambe posiblemente danki na declaracion di testigonan cu ta basha abao durante interogacion, Cuerpo Policial y Ministerio Publico a cuminza enfoca mas y mas riba un tereno, riba cual tin un container cu ta sirbi como ‘cas’.

Mirando e cantidad di declaracion, observacion, y resultado di vigilancia, Ministerio Publico finalmente a duna OK pa nan bay tene un accion y razzia.  E razzia a tuma lugar den silencio total, y ni prensa no tabata sa di esaki.

Apenas Diabierna 17 di Januari den oranan di dia, cu Vocero di Polis a dicidi na revela na prensa cu un razzia a tuma lugar.

A sali na cla cu Dialuna mainta trempan, esta 13 di Januari 2020, cu bao guia di Fiscal, un monton di Polis, Arrestatie Team, y oficial hudicial a yega na un adres den Arendstraat.

Polis no a revela si acaso esaki ta den Avenida Alo Tromp, of si acaso esaki ta den Caya Boes Orman.  Como cu casi Arendstraat no ta existi mas.

Ora cu nan a yega na e adres, aki tin un cas.  Pero parti patras di e cas, riba e tereno, tambe  tin un container den cual tin hende ta biba.

Oficialnan cu arma den man a drenta y a lanta e habitantenan di sorpresa.  Mesora nan a percura pa e homber, y tambe e muher eyden por haci nada mas, y no por huy.

Vocero Policial a bisa cu e dos personanan deteni, ta hendenan hopi peligroso.  Pesey a haci uso di Arrestatie Team di Polis pa ehecuta e razzia.

Nan a pone man riba e homber identifica como Marco E.T., y tambe e muher identifica como C.R.G.

Ora cu oficialnan hudicial a bay rista e container, nan a canta bingo!  Nan a bin haya un cantidad grandi di substancia blanco parecido na cocaina, tambe monton di marihuana tabatin eyden.

Fuera di esey, nan a haya suma grandi di placa, y tambe smartphones.

Lo mas espantoso ta cu e hendenan aki tabatin 4 arma scondi eyden, di cual uno di nan ta un arma automatico tipo Uzi, di fabricacion Israeli.

E armanan Uzi ta conoci di ta un tipo di sub-machine gun, y tin algun cu ta cay bao di machine pistol.

Awor e interogacion di e dos hendenan aki a start, y Ministerio Publico ta spera di por saca mas informacion for di nan.

Toch keto bay Cuerpo Policial ta pidi cooperacion di pueblo.  Si acaso bo tin mas informacion di e caso aki na Arendstraat, ta ser pidi pa yama e Tipline di Polis na 111-41.  Corda cu pa ley, bo ta keda anonimo ora di haci e yamadanan aki.

 

- Advertisement -

DUNA COMENTARIO

Please enter your comment!
Please enter your name here