Home Editorial Peliger mundial y e debenan cu ta mara Aruba na paisnan desconoci

Peliger mundial y e debenan cu ta mara Aruba na paisnan desconoci

155
0
SHARE
- Advertisement -

Editorial

Situacionnan di gran preocupacion ta presenta nan mes na paisnan poderoso riba diferente tereno.

Aruba ta depende di mundo den tur sentido, sigur despues cu for di 2010 e futuro y bienestar di Aruba a wordo entrega na paisnan y instancianan den exterior.

Ora nos papia di debe nacional, nos ta papia di debenan cu e pais a crea. Politiconan no ta splica nos, ta cual instancia na cual pais, nos debe placa. Unda Aruba a fia placa pa cubri su necesidad? Cuanto Arubiano a mira e lista di instancianan y paisnan cu ta envolvi den e debe nacional cu nos mester paga y ta un di e causantenan di nos crisis?

E momento a yega pa Aruba bandona politikeria y pa nos haya contesta riba un asunto mucho mas grave.

Cual ta e companianan cu mester ricibi placa di Aruba y ta cobra Aruba durante tres decada for di awor pa compromisonan cu gobierno anterior a cera den cuadro di proyectonan PPS cu ta hipoteca directo di futuro?

Proyectonan  PPS ta nifica, cu gobierno anterior a yega na un acuerdo cu un grupo di empresa priva pa e  empresa diseña, construi y mantene proyectonan enorme manera Green Corridor. Durante gobierno anterior no tabata tin placa pa paga, pero a firma acuerdo cu ta haci cu awor Aruba ta cuminsa paga.

E autoridad financiero di Aruba, a kibra e limitenan politico di discusion riba e proyecto aki. Como Auditorio General di Aruba, el a produci relatonan sumamente preocupante pa e debenan cu Aruba tin cu empresanan durante e proximo decadanan.

Aruba tin lista di e companianan y nan sistema mundial di financiamento? Cual instancia financiero mundial finalmente a paga pa placa cu Aruba awor mester debolbe?

E monton pa reconstrui hospital di Aruba y e base financiero di e proyecto Citgo ta mara Aruba ta sumanan enorme cu instancianan den exterior cu pueblo no conoce. Nunca gobierno anterior a splica pueblo con placa lo yega y lo sostene proyectonan y di cual pais Aruba ta depende.

Mester tene cuenta cu empresanan internacional tambe ta fia placa na banconan mundial.

Nos ta papia di gobierno anterior, pasobra ta e gobierno cu a baha na 2017 ta e prome gobierno den nos historia cu directamente a hipoteca Aruba mientras na mes momento su maneho tabata fuera di alcance financiero di e pais.

Na 1986 tambe ta cu riesgo grandi di garantia, a rebiba economia pa medio di turismo. Pero sikiera tabata tin e hotelnan como garantia pa e prestamonan.

Na e momento aki, Aruba tin debe cu paisnan y empresa desconoci. For di cual pais a drenta placa pa brug, caretera, hospital, tram? Con e borg ta regla? E ta basa riba nos placa di belasting so?

E situacion mundial actual ta exigi pa politikeria bandona escenario na Aruba y pa Aruba haya splicacion di e interesnan financiero mundial na cual e pais a wordo mara entre 2010 y 2017 ora a crea debe nacional pero tambe a introduci hipoteca pa proyectonan cu Aruba mester paga den un mundo peligroso.

- Advertisement -

DUNA COMENTARIO

Please enter your comment!
Please enter your name here