Home General Ni ayera ni awe Citgo tabata tin algo pa ofrece Aruba

Ni ayera ni awe Citgo tabata tin algo pa ofrece Aruba

183
0
SHARE
- Advertisement -

Citgo tin mas debe cu e tin placa pa paga debe

*Hopi trahado na Aruba indirectamente ta victima

*Ayera Merca a bolbe duna Guaidó tres luna pa Citgo

Nos por comprende cu e trahadonan di Citgo ta den un problema. Pero nos ta comprende tambe, cu ni trahado ni contratista por bay contra pueblo pa algo cu mester a mira delanta.

Pa loke ta trata contratista, cu ta cay segun nos leynan bou Camara di Comercio, nos por ta sumamente cortico. Camara di Comercio a adverti pa e acuerdo cu a wordo firma y e forma con e acuerdo a pasa den Parlamento.

Pa loke ta trata trahado, mester ta honesto. Sindicatonan cu ta representa trahadonan mester a analisa henter e proyecto y adverti trahadonan pa e resultadonan cu e proyecto tin pa trahadonan.

Pa tanto e contratista como e trahado mester conclui, cu tabata tin tur evidencia cu Citgo tabata un fantasia cu lo a rementa den man di Aruba.

For di momento cu Aruba a firma e acuerdo cu Citgo, tabata conoci cu Citgo tabata tin mas debe cu e tabata tin placa y tabata tin importancia special pa su dirigentenan.

Cualkier compania cu kier establece nan mes na un pais, mester duna prueba cu nan por cumpli cu e pais. Den e caso aki sigur no tabata tin ningun prueba na 2016 cu Nicolas Maduro por a cumpli cu Aruba.

Ni Citgo ni Nicolas Maduro tabata tin placa cu ta e base pa un hende por haci negoshi. Citgo tabata y te awe ta marca pa debe na un cantidad di compania.

Ayera Gobierno di Merca a bolbe sigura cu e grupo di compania cu kier haci uzo di Citgo pa nan haya placa cu Citgo of Venezuela debe nan, no bira nan propiedad.

Ayera Gobierno di Merca a duna Juan Guaidó tres luna mas pa soluciona e problemanan di Citgo cu varios compania kier bende pa nan haya nan placa.

Sindicatonan mester tabata na haltura cu e realidad di Citgo no tabata e realidad cu gobierno anterior a presenta na Aruba. Sindicatonan mester a haci investigacionnan necesario y mester a duna oido na e preocupacionnan serio cu tur instancia a trece dilanti.

Lo no ta na su luga pa awo pueblo di Aruba cu a bira victima directo di e proyecto Citgo, bay sufri tambe pasobra e trahadonan di Citgo a perde trabou.

E menasanan cu nos ta tende, no ta husto enfrente pueblo cu ta bira victima di un proyecto cu a kibra nan futuro tambe.

Nos mester ta consciente cu e situacion na Aruba a wordo origina tambe dor di e hecho cu Citgo no a habri su portanan na 2018. Si Citgo a habri su portanan na 2018, e chens ta grandi, cu e mester a cera e portanan na 2019 ora un guera civil a start na Venezuela y Citgo a pasa pa Guaidó mientras PDVSA a keda pa Maduro.

Na 2016 y na 2020, Citgo no tin placa. Nada a cambia. Citgo no tabata capaz na 2016 pa cumpli cu Aruba y na 2020 tampoco e por cumpli cu Aruba.

Henter Aruba a keda sin crecemento economico y henter Aruba ta biba cu e resultadonan.

Awe no ta na su luga pa pone mas peso riba un poblacion y sigur no menasa pa un situacion cu mester a preveni na 2016!

- Advertisement -

DUNA COMENTARIO

Please enter your comment!
Please enter your name here