Nacionnan Uni kier un clarificacion di Gobierno Hulandes y di Aruba relaciona cu caso di disidentenan Cubano deporta

    447
    0
    SHARE
    - Advertisement -

    ORANJESTAD (AAN): Nacionnan Uni a puntra gobierno Hulandes pa un clarificacion relaciona cu deportacion di dos disidente Cubano door di Aruba Airlines. E Cubanonan ta alega cu nan a wordo forza pa bandona nan patria.

    Segun publicacion di Nieuwsuur, nan a entrevista e dos Cubano y wak documentonan cu a indica cu Aruba Airlines ta den mannan di un Venezolano, algo cu segun ley, no ta permiti pa motibo cu un Arubiano mester ta doño di e compania.

    Aparentemente regimen Cubano ta deportando disidentenan Cubano y ta usando Aruba Airlines pa haci esaki.

    Hulanda y Aruba a indica cu nan kier pa Aruba Airlines cumpli cu e procedura di seguridad, pero nan no a duna comentario relaciona cu e deportacionnan. Nieuwsuur a indica cu segun Gobierno di Aruba, Aruba Airlines tin tur rekisito legal pa opera.

    Nieuwsuur  tambe a acerca gobierno Cubano, cu a señala cu nan ta rechaza cualkier alegacion di deportacionnan. Aruba Airlines tambe a indica comentarionan similar. E dos Cubano a viaha boluntariamente, y e aerolinea no tin culpa. Pero Nieuwsuur a enfatiza cu nan tin e paspoort y detayenan di vuelo pa comproba e storia di e Cubanonan.

    Nacionnan Uni a ricibi keho di  Eliecer Gongora y tambe ta investigando un keho similar di otro Cubano. Daniel Llorente Miranda a bisa cu el a wordo expatria pa Gobierno Cubano na Mei pasa cu un vuelo di Aruba Airlines.

    Investigacion di Nieuwsuur a haya documentonan cu tin indicacionnan riba un propiedad ilegal riba structura ilegal di Aruba Airlines. Ley nan di Aruba ta stipula cu e aerolinea mester ta propiedad di un Arubiano. Esaki ta importante pa preveni influencia extranhero y reforza nan posicion independiente di e isla.

    Gobierno di Aruba a bisa cu Aruba Airlines ta den mannan di un residente Arubiano y ta cumpli cu ley, pero esaki ta den contradiccion cu informacionnan cu Aruba Airlines a duna na Nacionnan Uni y Nieuwsuur. E aerolinea a reporta cu Esteban Vallés ta e doño di e compania. Vallés ta naci na Venezuela, pero tambe tin nacionalidad Mericano. Segun Aruba Airlines e ta residencia na Miami. Den un carta na Nacionnan Uni, Aruba Airlines a skirbi: “E ultimo doño legal di e ‘shares’ ta Esteban Juvenal Vallés.” E carta a wordo co-firma pa Vallés mes.

    Segun Nieuwsuur, regimen di Venezuela y Cuba ta aliado y ta provee otro cu varios servicio, kiermen no lo ta algo fuera di normal cu e regimen Venezolano ta usa Aruba Airlines den un acuerdo cu Cuba.

    Oficina di Alto Comisionado di Derechonan Humano na Geneva a pidi clarificacion for di gobierno Hulandes, di Aruba y Cuba. Aruba Airlines tambe a wordo notifica.

     

    - Advertisement -

    DUNA COMENTARIO

    Please enter your comment!
    Please enter your name here