Home General E comerciante local ta en espera di Camara di Comercio

E comerciante local ta en espera di Camara di Comercio

169
0
SHARE
- Advertisement -

Manera a wordo spera, e siman aki e constelacion renoba di directiva di Camara di Comercio a mira luz. Ta na su luga pa yama bon bini na e tres miembronan nobo den e instancia semi-gubernamental cu ta encarga na un forma particular cu e buena marcha di comercio local.

Pa un grupo demasiado grandi di Arubiano, ainda no ta completamente cla, cu e renobacion anual di Camara di Comercio ta segun reglanan legal cu ta exigi eleccion di algun miembro nobo anualmente dor di miembronan di Camara di Comercio.

E hecho cu no tin eleccion pasobra no tin mas cu un candidato pa e puesto habri den Comercio Chikito of Comercio Grandi, ta algo cu sigur e directiva mester atende pa asina sigura e base democratico di Camara di Comercio.

Aruba mester wordo informa tambe cu no ta e siman aki a vota pa miembronan nobo di directiva, pero cu e siman aki simplemente a instala e miembronan nobo y a vota pa un presidente nobo entre e personanan cu a base di e registronan comercial di Aruba a wordo eligi na 2019.

Nos proceso democratico ta exigi cu e ciudadano ta na haltura di ley y di tur parti di nos cuadro di ley. Pues na prome luga e funcionamento di Camara di Comercio mester bira mas conoci pa pueblo pa mas hende haci uzo di posibilidad pa asisti e bon funcionamento di e ramo comercial na e pais.

Camara di Comercio ta directamente encarga cu e circulacion basico di placa na Aruba, cu den nos sistema di economia habri ta sosode pa medio di negoshi priva.

2020 ta exigi un participacion total di gremionan y sigur Camara di Comercio. Ora nos papia di participacion nos no ta pensa solamente na e derecho cu tur ciudadano y asina tur organisacion cu ta traha pa e pais, tin pa participa den gobernacion di e pais.

Esaki ta hustamente e base di Parlamento cu ta representa pueblo y e base di funcionamento di nos comunidad.

Participacion di gremionan mester yuda politiconan pa cual henter pueblo a vota, yega na un maneho pa henter Pueblo.

Pa Camara di Comercio un labor sumamente importante y di gran prioridad ta, pa asisti e empresanan local cu no tin e makinaria si empresanan internacional cu hasta por uza formularionan y sistemanan administrativo di nan oficinanan mundial central.

E comerciante local, cu ta depende completamente riba su propio organisacion, ta e prome cu mester di asistencia di Camara di Comercio cu demanda nobo den e tempo cu mundo ta atende cu e transferencia historico di placa di un generacion pa otro.

Na mes momento e comerciante local mester adapta su mes na funcionamento a base di e nivel halto di Inteligencia Artificial, den cual e meste haya guia y posibilidad efectivo pa ahusta su mes.

Nos kier yama bon bini na e Presidente nobo di Camara di Comercio y su team y ta expresa nos speransa di un cooperacion pa bienestar di Pueblo di Aruba, e meta principal di periodismo y Camara di Comercio.

- Advertisement -

DUNA COMENTARIO

Please enter your comment!
Please enter your name here