Home Deporte Dedicacion di ASA y ARUBIANO na nos hobennan deportista ta sigui fuerte

Dedicacion di ASA y ARUBIANO na nos hobennan deportista ta sigui fuerte

378
0
SHARE
- Advertisement -

Varios proyecto pa 2020

ORANJESTAD(AAN): Diaranzon DIARIO a haci un entrevista cu David “Appie” Abdul, kende ta un entrenador di Aruba Soccer Academy (ASA), cu for di algun aña caba ta ricibi sosten di e marca ARUBIANO.

For di 2017 ASA ta trahando duro pa desaroya y forma nos futbolistanan na Aruba.

Aña pasa e academia a desaroya strategianan pa yuda mucha y hobennan di menos recurso tambe, pa nan tambe por participa na e camp y entrenamentonan di futbol.

Pa haci esaki posibel tabata tin mester di e aporte y sosten diferente compania y empresa y ARUBIANO ta uno cu a bin dilanti pa yuda na tur manera posibel, mirando e admiracion cu nan tin cu locual ASA ta haci.

Durante e entrevista, Abdul  a splica cu ARUBIANO ta yuda hopi den promocion, yuda cu e campnan y cu uniform.

E intencion ta pa stimula mas mucha pa practica deporte, cu ta algo cu ta yuda nan keda leu di caya y problema.

Pa 2020 ASA tin varios cos riba nan programa.

Un di esakinan ta e asina yama Socatots cu ta pa muchanan di 1 te cu 3 aña tin cu bin y participa cu nan mayornan, unda cu e mama y/of tata ta conecta cu nan yiu via e deporte.

Actualmente tin 60 pa 80 mucha ta participa na esaki, segun Abdul.

ASA tin un proyecto tambe pa pariba di brug, mientras cu nan tin tambe ASA Pro pa muchanan di alrededor di 13 pa 15 aña, cu ta e mihornan den nan edad.

“Nos pone nan hunto pa train nan separa, pa asina hisa nan nivel y duna nan tambe guia di huiswerk, pa asina haci tur cos via un proceso profesional”.

Esaki segun Abdul, kende a splica cu ASA tin tambe un parti cu ta yama AGA (Aruba Goalkeeper Academy) cu ta specialmente pa keeper so.

Esaki ta cuminza dia 2 di Februari.

Ta prome biaha cu Aruba ta bay tin un academia di keeper so.

Un proyecto interesante tambe di ASA ta un torneo di bario, unda cu lo trece un torneo di futbol den diferente bario.

“Hopi biaha no ta facil pa e muchanan yega unda cu e torneo ta y pesey na 2020 nos ta bay trece un cancha den e bario pa organiza un torneo den nan bario”.

Esaki segun Abdul, kende a sigui bisa cu e ganadornan di cada bario lo hunga contra otro e ora ey.

Asina e muchanan ta ripara tambe cu no ta pasobra bo ta di un bario, bo tin cu bringa cu hobennan di otro bario.

“Si bo kier bataya cu otro haci esey den deporte, pasobra e vision di ASA mescos cu di ARUBIANO ta pa uni hende via di deporte”, segun Abdul, kende a splica tambe cu lo bin cu un camp tambe pa pariba di brug.

ARUBIANO Y ASA ta bay organiza e camp pa pariba di brug e aña aki.

E fecha no ta determina ainda, pero e ta bay ta algo bunita pa e muchanan.

Como cu ora cu Abdul tabata hunga futbol profesional na Hulanda e tabata bisti number 45, ARUBIANO ta bay saca un linea di paña basa riba e number 45.

Banda di tur esaki tin tambe plannan grandi pa muchanan muher, mirando cu futbol di hende muher ta creciendo.

Un di e hungadornan di e seleccion campeon mundial Mericano a pidi pa e hendenan muher den futbol wordo paga igualmente cu e hombernan y esaki te ainda ta un discusion importante.

E ta muestra si di con futbol di hende muher ta creciendo.

Abdul a splica cu na Aruba tin varios mucha muher cu ta hungando futbol y ASA tin un programa pa muchanan muher di 4 pa 16 aña cu ta interesa pa hunga y kier uni nan mes despues na un equipo.

E programa pa mucha muher yama ‘Always Girl Program’.

- Advertisement -

DUNA COMENTARIO

Please enter your comment!
Please enter your name here