Cantidad di turista rabia cu mester a warda casi 3 ora largo den rij na Inmigracion

    3295
    0
    SHARE
    - Advertisement -

    Na nan yegada na Aruba bispo di aña nobo:

    ORANJESTAD (AAN)— Net e bispo di cambio di aña, un cantidad grandi di turista a yega Aruba pa ricibi Aña Nobo riba e Isla, y aunke ta masha positivo cu tantisimo turista, y mas tanto for di Merca, a scoge nos pais pa bin duna bon bini na 2020 y e decada nobo, esnan cu a yega entre traimerdia y atardi, a pasa den un mal rato pasobra solamente 3 hende tabata tin na Inmigracion pa atende cu tur e bishitantenan aki.

    Aunke ora cu e potret aki a wordo saca, tabatin solamente 2 booth habri, di cual cada uno tabatin 1 funcionario ta traha y atende turista.

    Ta conoci cu na Inmigracion tin poco personal for di basta luna caba, y cu gobierno no ta pone mas hende traha pasobra mester baha gasto di personal, pero e bishitantenan no tin idea di esey, y tampoco ta algo cu mester interesa nan, pasobra ta e bon servicio pa cual nos pais simper a distingui cune, ta locual nan ta spera.

    Turistanan cu a yega den un vuelo cu a baha pa 4.20 di atardi por a sali tuma un taxi te 7 or di anochi, y nan a keha cu e taxistanan mes. Ora un di e taxistanan a mira cu ta na cantidad  e turistanan a bin pafo buscando taxi, a cuminza yama su coleganan y mesora nan a bin y por a transporta e turistanan pa nan respectivo hotel. Taxistanan cu a yama nos, igualmente un trahador di un hotel, a expresa cu ta un berguenza cu esaki ta sosode na Aruba. Turistanan cu a drenta hotel hopi fada y cansa, cu mas gana di bay nan camber subi cama y drumi, cu warda e cambio di Aña. Hotelnan, afortunadamente ta completamente yen. No obstante, un pareha cu tin 15 aña consecutivo biniendo Aruba pa e temporada aki, a laga sa cu si e sistema no cambia nan lo busca otro destinacion!

    DIARIO a tuma contacto cu aeropuerto y a pidi comunicacion cu oficina di PR, y den esaki tin cu gradici e recepcionista Natasha cu a haci tur su best pa haya un trahador autoriza pa duna DIARIO informacion, locual el a haya pero mester a pidi info via email. Esey a wordo haci y a keda pendiente di e contesta.

    En todo caso, lo ta bon pa Minister di Husticia y Minister di Turismo tuma bon nota di e situacion cu a presenta bispo di Pasco, pasobra e por afecta Aruba su industria di turismo, cu con cu e wordo mira, ta e unico pilar economico cu Aruba tin na e momentonan aki!

    - Advertisement -

    DUNA COMENTARIO

    Please enter your comment!
    Please enter your name here