Home Comercio Awor un comerciante nobo ta confrontando menos red-tape na Aruba compara cu...

Awor un comerciante nobo ta confrontando menos red-tape na Aruba compara cu antes

228
0
SHARE
- Advertisement -
— Maria Dijkhoff-Pita.

ORANJESTAD (AAN): E reclamo cu semper tradicionalmente bo ta tende di hopi ciudadano algun aña atras, na momento cu nan ta cuminza aplica pa permiso y tur documentonan pa asina por bay habri un negoshi nobo, semper ta enfoca riba un solo cos:  “Aruba tin demasiado red tape”.

E red tape aki ta referi na e burocracia grandi cu un ciudadano ta topa cune, ora cu e mester cana di departamento pa departamento, di adres pa otro lugar, djis pa por keda cla, haya permiso, aprobacion, y keuring, y mucho mas djis pa e habri un negoshi nobo.

Algun aña pasa, e ‘red tape’ aki tabata asina diki, cu dado momento por a mira hopi Shopping Centers y Business Centers a habri pero cu cantidad di lokaal habri.  Djis pasobra tabata un caminda di cruz pa por haya tur cos keda cla rapido pa asina bo por cuminza cu un compania nobo.

Awor den Siglo 21, Gobierno kier haci un cambio na esey.

Directora di Departamento Economico, Maria Dijkhoff-Pita a laga sa recientemente den un entrevista cu DIARIO cu e ta honesto pa bisa cu e ‘red-tape’ no a wordo elimina completamente ainda.  Sinembargo Gobierno ta tratando di haci esey cada biaha mas y mas comodo.

Por mira con e.o. Departamento di DIMAS y tambe di Impuesto DIMP ta bayendo mas y mas riba e epoca di automatizacion, cu nifica cu e clientenan lo mester cuminza acudi menos na e Departamentonan, of warda.

Departamento di Asuntonan Economico, esta DEACI na 2019 a lanza nan website completamente renoba, y via di e portal aki bo pro haci bo cita.  Aunke cu keto bay riba tur Diaranson bo por djis yega y drenta na e Departamento aki, tin di tene cuenta cu tur e otro dianan nan ta atende publico solamente via cita.

Esey nifica cu ora bo yega na Departamento di Asunto Economico DEACI, bo mester warda pa e cita.  Ta djis yega y bo ta drenta pa e cita.

E siguiente paso cu DEACI ta trahando riba dje, ta pa lanza sistema di ‘e-Forms’.  Pues si bo no kier wak esnan di DEACI, bo no mester bin.  Bo ta djis bay na e website, haci e peticion, y bo ta scan bo documentonan via e-Forms.

Unavez cu bo upload bo peticion y a scan e documentonan exigi, na DEACI lo bay analiza tur esaki y na despues di evaluacion nan lo manda mensahe pa e persona pa bise si tur cos ta na ordo, y ta hasta permiti bo di haci pago via bo banco preferi.

Maria Dijkhoff-Pita a bisa cu den futuro e website mes lo bay acepta pago.

Toch corda cu na final bo mester bay na Departamento di DEACI personalmente ta pa busca e permiso.  Pasobra e permiso keto bay ta un documento firma y esaki bo tin di bay busca.

Hasta aki, segun DEACI, den futuro kizas lo bo bay haya e permiso electronicamente.

Di e forma aki, DEACI ta trata na contribui pa reduci e red-tape den Gobierno den tur proceso.  Segun e Directora di Asuntonan Economico, nan sa cu e comerciante tambe ta druk y tin hopi cos pa atende aparte di su negoshi, y e lo no kier bay perde tempo na DEACI.  Y pesey mes e seccion aki ta tratando na automatiza.  Tambe den henter Gobierno tin mas facilidad crea cu ta reduci e proceso di red-tape na Aruba.

Ademas awor den 2019 y 2020 danki na Exprodesk y tambe Idea,  nan ta dunando un empuhe grandi na comerciantenan actual y futuro empresarionan haya sa mas di e proceso corecto cu negoshinan na Aruba tin di tuma pa bon maneho y cumpli cu tur rekesito legal.

Di e forma aki, Gobierno di Aruba ta bira mas servicial pa cu comercio na Aruba.  Y lo sigui traha duro pa elimina red-tape tur caminda, y den futuro comerciantenan nobo lo tin di bay cana menos caminda di cruz pa por start nan negoshi.

- Advertisement -

DUNA COMENTARIO

Please enter your comment!
Please enter your name here