Home Policial Igor Kock awor a bira sospechoso di e candela fatal di Papilon

Igor Kock awor a bira sospechoso di e candela fatal di Papilon

1268
0
SHARE
- Advertisement -

E propio ruman…

ORANJESTAD (AAN): Autoridad a sigui investiga e caso di e candela cu a causa morto di un hoben di 32 aña na Papilon 61-A.  Ta ora cu Bomberonan a cuminza paga e candela, nan a bin haya e curpa di Rigoberto Junior Chemi Gilberto Kock, mihor conoci como Rigo.  E no tabata duna señal di bida.

Algun rato despues, Polis a aresta e ruman homber di e victima, esta Igor S.R. Kock di 37 aña di edad.  Aunke na prome instante, vocero di Polis Lito Lacle a splica cu e detencion di e ruman tabata relaciona cu na e lugar di candela e no kier a sigui ordo di Polis, y pesey a bay cune pa calme un poco na Warda di Polis.

Pero awor ta saliendo na cla, cu e por tin algo di haber cu e candela y e morto di su ruman.  Igor awor ta encarcela keto bay y ta sigui wordo interoga.

Igor di 37 aña di edad, ta un persona cu ta acostumbra di wordo interna na ex-PAAZ relaciona cu diferente problema.  Tin indicacion cu net riba Dialuna, el a sali bek di e internado y a regresa cas.  Mesun dia cu su ruman a fayece.

Autoridad ta investigando e posibilidad cu tin friccion entre Igor y e ruman Rigoberto Jr. cu a fayece.

Tambe ta investigando e hecho cu tabatin un explosion na e cas, aunke ningun botter di gas a explota.  Bomberonan a mira cu e relief valve di e botternan a habri pa reduci presion interno den e botternan.

E presion interno di un botter di gas ta bay halto solamente ora cu e botter aki wordo exponi na cayente intenso, por ehemplo si bo kima algo bao di nan.  Tur esey awor ta wordo investiga door di Departamento di BFTO di Recherche.

Manera DIARIO a trece dilanti caba, tabata Dialuna banda di 2:45 pm cu alarma a ser bati y tanto Polis como tambe un unidad di Bombero di Tanki Flip y un otro di Aeropuerto a mobiliza pa cas di famia Kock.

DIARIO ta expresa palabranan di profundo pesame na famia Kock-Figaroa den e momentonan dificil aki.

 

- Advertisement -

DUNA COMENTARIO

Please enter your comment!
Please enter your name here