Home arte y espectaculo Otro gran leyenda musical di Aruba a fayece

Otro gran leyenda musical di Aruba a fayece

1987
0
SHARE
- Advertisement -

Tony Thijsen tabata e genio riba harpa

ORANJESTAD (AAN): Aña 2019 ta bay wordo recorda, como e aña cu gran musiconan a fayece.

E siman aki, un musico grandi y sigur un ciudadano ehemplar a fayece.

Net riba Pasco, e informe a drenta cu Tony Thijsen a fayece.  E ta un persona di Savaneta cu pa hopi hende ta ser mira como un leyenda den musica di Aruba.

Tony tabata wordo considera como un genio den instrumento di harpa.  Es mas, pa hopi hende e tabata e persona cu ta toca harpa mihor na Aruba.

Cu 6 aña di edad el a cuminza siña toca guitara, y cu 7 aña di edad el a bin nota cu e tin bon orea pa musica.

Tabata na 1953 cu el a forma un trio, cu cual el a briya bastante tempo cune, esta “Trio Conquistadores”.  E trio aki tabata presenta un combinacion magnifico di harmonia di voz y acompañamento di guitara, y rapidamente a bira e grupo mas gusta na Aruba.  Nan tabata presenta nan musica den tur skina di e isla, formando e trio e tempo ey cu Mario ‘Chomai’ Thijsen y Miguel Boezem.

Un otro instrumento cu Tony a enamora cune tabata e harpa.  Na 1961 el a ricibi su prome harpa y a logra di bira hopi proficiente riba dje despues di apenas 1 aña di practica cune.

E gran artista aki di Savaneta aki tabata dispone di un habilidad impresionante pa domina harpa na un forma sumamente agradable.

A yega asina leu cu el a bandona su trabao di dia, y a bay full-time tocando musica pa huespednan na Manchebo Beach Club,  El a duna presentacion tambe na Divi Divi Beach Hotel y despues tambe na Strand Hotel (actual Reflextions Beach), sigui pa Aruba Beach Club.

Tony Thijsen a yega di produci un longplay disco tambe hunto cu Padu del Caribe.

E habilidad di Tony a bay mas leu, ora cu e mes a cuminza traha su harpa na Aruba.  El a traha varios harpa mas pa amante y demas studiantenan di musica na Aruba.

Tony a sa di duna presentacion tambe den exterior, e.o. na Puerto Rico, Venezuela, Hulanda, bao patrocinio di Oficina di Turismo di Aruba.

Na su yiunan y demas famia, DIARIO ta manda su mas profundo palabra di condolencia.  Awor e harpa di Tony lo sigui resona den cielo.

- Advertisement -

DUNA COMENTARIO

Please enter your comment!
Please enter your name here