Oficina di abogado , acuerdonan y cifranan den cuentanan anual

    306
    0
    SHARE
    - Advertisement -

    Analisis

    Uno di e problemanan mas grandi cu Aruba conoce, ta e forma cu politiconan hopi bes ta kere cu tur sabiduria ta di nan.

    Informacionnan ta wordo entrega na pueblo cu e pensamento cu tur hende ta bobo y cu solamente den partido ta topa cu hende cu no tin aspecto di burico.

    Ta cu e creencia cu pueblo ta bobo, ta manipula informacion cu ta duna pueblo cu na Aruba sigur tin un grado halto di enseñanza, ya cu na Aruba tur hende ta bay school. Ta pasobra nan a bay school, nan por traha, paga belasting pa sostene politiconan cu ta kere cu tur hende tin aspecto di burico.

    Pa basta dia, nos ta contempla e asunto di oficina di abogado. Nos no kier bay den cual abogado a haci kico, pasobra nos kier sali for di e punto di bista cu decencia ta parti di Arubianismo. Cifranan lo demostra cu mas a basha awa den Arubianismo, mas Aruba a sufri cu decisionnan cu falta di Arubianismo ta crea.

    Pakico y na cual momento Aruba y e companianan cu gobierno por atende na nomber di pueblo pasobra nan no ta propiedad di gobierno, por dicidi pa un abogado priva.

    Nos ta haci uzo aki di palabra “priva” pasobra Aruba conoce un departamento huridico y conoce posicionnan den su aparato gubernamental cu ta sigura cu e cuadro di ley di Aruba ta wordo respeta.

    Cu tin partido cu ta kere cu tur hende cu no ta politico tin aspecto di burico, nos por a ripara na e forma cu a trapa ley ora e introduci Citgo na Aruba. A trapa riba nos sistema legal mas importante cu ta e forma cu nos pais ta hinca den otro pa medio di constitucion.

    Nos no ta bay den detaye den e acuerdo, cu instancianan cu mester revisa si legalmente e acuerdo y e forma cu a yega na e acuerdo, ta cumpli cu ley. Nos ta hasta pone un rato un banda, e loke Raad van Advies a cuestiona den e acuerdo di Citgo y e forma cu a introduci Citgo cu tabata ilegal.

    E cantidad di riesgonan cu Citgo tabata contene pa Aruba, ta haci nos puntra nos mes si no tabata miho pa e politiconan cu a hunga sabi cu pueblo, no mester a busca mas abogado pa evita cu awe Aruba ta den problema serio.

    Nos mester puntra nos mes si a scucha abogado priva, a scucha conseheronan experto den gobierno y Raad van Advies ora a hinca pueblo den e aventura di Citgo cu awe nos mester paga pa soluciona.

    Na mes momento nos mester di abogado y pa no papia mes di accountant paden y pafo di gobierno pa mira kico a pasa cu nos placa. Hasta nos mester pensa si no ta bon pa pidi polis, marina of cualkier instancia cu tin cacho cu ta hole bon, bin yuda nos descubri con a rementa nos bienestar.

    Nos no kier yega na ningun conclusion. Nos ta keda investiga cuentanan anual di gobierno, di companianan di gobierno, di fundacionnan di gobierno pa mira kico nos mester pensa di uzo of no uzo di asistencia legal, di abogacia y experto.

    Pasobra nos si ta convenci cu na Aruba ta dificil pa haya hende cu aspecto di burico.

    - Advertisement -

    DUNA COMENTARIO

    Please enter your comment!
    Please enter your name here