Home Hudicial No tin ningun prueba cu duo sospechoso ta esnan cu a haci...

No tin ningun prueba cu duo sospechoso ta esnan cu a haci asalto arma y bay cu 48 mil florin

64
0
SHARE
- Advertisement -

Abogado mr. Kip ta señala cu e testigo principal lo ta tapa pa esnan real culpable

ORANJESTAD (AAN) – Abogado di e hombernan J.G.M. y J.M. acusa di a haci un atraco arma riba un persona cu tabata hiba placa di dos pomp di gasoline pa deposita, a para riba cu no a haya ningun prueba. No a haya ningun fingerprint, no a haya nada na e cas cu ta mustra cu e duo lo a haci e asalto arma. E abogado a cuestiona cu e testigo principal, e homber R., kende tabata esun cu tabata encarga cu core e di dos auto, na su cas a haya placa di e asalto arma y recibo di deposito di banco. E abogado ta haya cu R. ta punta dede riba J.G.M. y J.M. pa asina tapa pa esnan real culpable. Ta asina cu Fiscal a exigi 5 aña di prison pa cada un. Den e articulo aki DIARIO ta publica e defensa di mr. Kip y den un otro articulo ta publica, tratamento di e caso y exigencia di Fiscal.

ARMA HAYA NO TA SIRBI PA NADA

Abogado mr. Kip, despues di a scucha Fiscal exigi 5 aña di prison pa su dos clientenan J.G.M. y J.M.,  a bisa Hues cu Polis a detene J.G.M. y J.M. na e cas na Pos Abao na unda nan biba. Polis a haci investigacion hopi profundo y a haya den camber di J.M. un arma di candela cu balanan.    E abogado a mustra cu segun investigacion di Polis, e arma di candela no ta sirbi pa tira. Segun e abogado, Fiscal ta papia cu lo a uza e arma aki pa menaza e persona cu saconan di placa. Na opinion di mr. Kip, no por bisa esey pasobra e arma no ta sirbi.

TESTIGO TA TAPA PA OTRONAN

E abogado a bisa Hues, durante e investigacion pisa na e cas, Polis no a haya net net nada cu ta mustra cu J.G.M. y J.M. lo a participa na e asalto arma.

Mr. Kip a bisa Hues cu doño di e pick up F., cu ta padrastro di e testigo R., a bisa Polis cu R. tabata riba e mal caminda cu dos persona hopi pisa y conoci di Polis. E personanan aki no ta e dos sospechosonan. E abogado a sigui bisa cu hendenan e padastro F. di kico R. tabata haci.

TESTIGO HAYA CU PLACA DI ASALTO ARMA

E abogado a mustra cu na Papaya, unda e homber R., cu a core un di e autonan di asalto arma, ta biba, a haci investigacion y a haya cosnan y tambe arma cu ta mustra di ta procedente di e asalto arma. Na opinion di mr. Kip, ora cu Polis a interoga R., el a bisa cantidad di cos contra J.G.M. y J.M. E abogado a bisa cu esakinan no tabata un sorpresa. R. conoce J.G.M. y J.M. y pesey a bisa Polis cu nan tabata sera pa casonan serio. E abogado a remarca cu loke si ta straño, cu R. ta menciona e cas unda J.G.M. y J.M. ta biba pero Polis no a haya net net nada den e cas.

NINGUN PRUEBA HAYA

E abogado a remarca cu R. no a bisa nada di e dos personanan pisa cu e ta anda cun’e. For di henter e investigacion, ningun caminda a haya un imagen riba video of fingerprint di J.G.M. y J.M. cu por usa y bisa cu nan ta envolvi. Ni e victima y otronan a reconoce J.G.M. y J.M. como sospechoso. Mr. Kip a bisa Hues cu J.G.M. y J.M. ta sera solamente a base di declaracion di R. E abogado a remarca cu esaki ta crea e sospecho cu ta parce cu R. ta purba wanta e otro dosnan cu a haci e asalto arma for di tur esaki. No a haya net net nada riba J.G.M. y J.M. A scucha yamadanan y a mira WhatsApp di e dos sospechosonan pero no a haya nada. E ta haya cu un declaracion di R. so, no ta suficiente pa condena e dos sospechosonan.

E abogado a bisa Hues cu loke si ta mas aceptabel pa cu preparacion di ehecucion di asalto arma, ta loke e padrastro di R. ta menciona di e dos personanan pisa cu R. ta anda. Posiblemente pa tapa e dos personanan pisa aki, a envolvi e dos sospechosonan aki.

SOSPECHOSO MAL HERIDA DEN KIA

E abogado a bisa Hues cu na Juli 2019, despues di a papia cu J.M., J.M. a wordo severamente maltrata door di tres otro preso ora e tabata cana bay su cel. E abogado a bisa Hues cu tin imagennan di video cu ta mustra claramente con J.M. a wordo maltrata.

E abogado a bisa cu J.M. ta sufriendo di hopi dolor di cabez. El a bisa Hues cu J.M. su bida ta core peliger den KIA.

E abogado a conclui cu e ta haya cu pa falta di prueba drechi, mester declara e dos sospechosonan liber.

Hues a bisa cu e ta bay studia e caso y dia 20 December 2019 lo tin sentencia pa 8.30 di mainta.

 

- Advertisement -

DUNA COMENTARIO

Please enter your comment!
Please enter your name here