Hopi hende buscando remedi antigripal den botica

    126
    0
    SHARE
    - Advertisement -

    ORANJESTAD (AAN) – E ultimo simannan hopi di nos ciudadanonan ta buscando den botica productonan antiviral cu por haya sin receta di docter.

    Tin boticarionan hopi profesional cu sa aconseha e clientenan bon, y puntra nan ora di cumpra cierto tipo di stropi pa tosamento of capsula antigripal, si nan ta sufri di presion halto, sucu, curazon, etc., y alomenos alerta nan riba e consecuencianan cu tuma algo cu kizas a alivia e malestar, pero ta contraproducente pa nan salud, por trece cune.

    Clientenan cu nan sa caba cu nan tin malesa cronico, pasobra cada tanto tempo nan ta despacha pa nan e recetanan di docter pa e malesanan aki, tambe nan ta corda nan cu tal of cual remedi nan no por tuma, pero logicamente ta keda na e cliente su decision si tume of no.

    Locual ta un hecho ta cu hopi hende ta hayando e griep pisa di e temporada aki y incluso, segun informacion cu DIARIO tin, algun persona cu ta bay Eerste Hulp cu problema di respiracion tin cu keda interna.

    Pesey lo ta bon pa personanan cu sintoma fuerte di griep miho no participa den eventonan nocturno cu ta tumando lugar, ni asina nan bay bon abriga, bon tapa, pasobra e sintomanan por empeora.

    Un bez mas DIARIO ta sugeri pa apenas aña habri di Departamento di Salud cuminza bek, tur hende cu falta di vacuna bay busca esaki na e Seccion di Malesa Contagioso.

    E personanan cu a haya e vacuna si haya e griep mes, lo haya hopi mas leve pasobra e ta proteha contra e virus nobo cu ta circula y masha fuerte mes.

    DIARIO, den otro articulo, ta elabora riba e sintomanan di influenza. Nunca ta di mas pa duna extra informacion.

    - Advertisement -

    DUNA COMENTARIO

    Please enter your comment!
    Please enter your name here