Home Hudicial Homber acusa di a hinca otro cu cuchio banda di curazon declara...

Homber acusa di a hinca otro cu cuchio banda di curazon declara liber

135
0
SHARE
- Advertisement -

Hues ta haya cu e sospechoso a actua den defensa propio

ORANJESTAD (AAN) – E homber Dominicano biba na Aruba M.B. a wordo declara liber di a hinca e homber G. (Coco) banda di su curazon dia 15 December 2018. Hues ta haya cu M.B. tabata den un situacion cu e no por a haci nada otro pa defende su mes di G. cu tabatin M.B. gara cu un yabi di lomba cu su mannan teni y e partner di G. tabata dal M.B. mokete den cara . Despues di 11 luna encarcela pa e caso aki, M.B. a wordo laga liber.

EXIGENCIA FISCAL

Algun siman pasa tratamento di e caso a tuma lugar caminda M.B. a wordo acusa di na April 2018 a maltrata e homber J. na un pomp di gasoline y December 2018 a hinca G. cu algo punta banda di su curazon. Fiscal a bisa Hues cu 17 April 2018, M.B. a bringa y maltrata e homber J. Fiscal a bisa cu e no ta haya, manera M.B. ta bisa, cu e mester a defende e muher. Na opinion di Fiscal, ta M.B. mes a bay busca problema. Pa loke ta e hincamento di 15 December 2018, Fiscal ta haya cu M.B. a hinca G. cu algo punta.

El a rasca G. diferente biaha y un hinca. Na opinion di Fiscal, no por papia di intento di mata. No por bisa cu M.B. a hinca cu hopi forza. El a pidi Hues pa declara M.B. liber di intento di mata. Fiscal si ta haya proba cu M.B. a purba causa maltrato severo. M.B. ta bisa cu e mester defende su mes. Fiscal a bisa cu G. a gara M.B. di lomba y por papia di defensa propio pero aki no ta asina. Na opinion di Fiscal, M.B. a hinca y e otro tabata dal. El a pidi Hues pa rechaza e defensa propio.

Fiscal ta haya cu ta M.B. mes a busca problema. E ta kere cu M.B. mes tabatin un arma cun’e. E ta haya esaki ta un caso serio. El a bisa cu for di e raport psicologo por compronde cu M.B. mester di ayudo. Fiscal a exigi 30 luna di prison (2 aña y 6 luna) di cual 10 luna ta condicional cu un tempo di prueba di 2 aña y bao guia di Reclassering. Esey ta nifica cu M.B. lo mester sinta 1 aña y 8 luna.

SENTENCIA

Ta asina cu M.B. no a presenta den sala di Corte pa scucha su sentencia. Hues a duna di conoce cu el a compronde cu M.B. a wordo laga liber promer cu e sentencia.

Hues a bisa cu mescos cu Fiscal, e no ta haya proba e promer acusacion intento di mata. El a declara M.B. liber di esey. Pa loke ta e hincamento, Hues a bisa cu mirando e posicion cu M.B. tabata aden, el a wordo gara pa G. cu un yabi di lomba. Hues a sigui bisa cu e victima G. tin mas forza cu e sospechoso. Hues a splica cu e ta haya cu for di e posicion cu M.B. tabata, esta gara di lomba y lanta den halto, e no por a hinca cu cuchio cu forza y dirigi pa mata. Esey ta haci cu Hues ta haya cu no por papia tampoco di cu M.B. tabatin di causa herida severo. No por proba tampoco di intento di causa herida severo.

Hues a bisa cu e ta haya legalmente proba cu M.B. a hinca G. cu un obheto skerpi. Pa loke ta e hincamento, Hues a mustra cu M.B. a bisa cu e mester a defende su mes. Hues ta haya cu, mirando e situacion cu M.B. tabata e momento ey, por papia di un situacion di defensa propio. Mirando cu G. a gara M.B. di lomba y lant’e den halto y laga su pareha dal’e cu mokete den cara varios biaha, M.B. no por a los y a coy un obheto skerpi pa asina e por los. Hues a bisa cu no tabatin otro forma pa M.B. por a defende su mes. No por a actua otro di a haci loke el a haci. Hues ta haya cu aki por papia di defensa propio y pesey e ta declara M.B. liber di e acusacion di a hinca G.

Pa loke ta e otro acusacion di a maltrata e homber J. na un pompstation, Hues ta haya M.B. culpable y castigabel. Pa cu e castigo, Hues a tene cuenta cu ta promer biaha cu M.B. ta presenta dilanti Hues pa un caso asina. Hues a condena M.B. na 6 luna di prison di cual 3 luna ta condicional cu un tempo di prueba di 2 aña.

 

- Advertisement -

DUNA COMENTARIO

Please enter your comment!
Please enter your name here