Home arte y espectaculo “Hey… ta Pasco!” tabata magico y inolvidabel 

“Hey… ta Pasco!” tabata magico y inolvidabel 

239
0
SHARE
- Advertisement -

Exitoso concierto den Ser’i Noka… 

ORANJESTAD (AAN):  Diahuebs anochi den un teatro di Ser’i Noka totalmente yen, cantante Edjean Semeleer a presenta e regreso di su popular concierto “Hey… ta Pasco!” cu tabata tambe su celebracion di 25 aña exitoso den e mundo di farandula.

Publico presente por a disfruta di un variedad di cancion y tambe artistanan excepcional invita cu a wordo compaña pa un excelente orkesta di musiconan local.

For di comentarionan di hopi di esnan cu tabata presente nos por a conclui cu e sintimento general tabata cu esaki tabata un concierto magico y inolvidabel.

Den pleno concierto, Edjean a wordo sorprendi door di Ministro di Cultura Sra. Xiomara Maduro, cu un homenahe y reconocemento den nomber tambe di Gobierno di Aruba pa Edjean su 25 añanan di excelencia artistico.

Despues cu publico presente a duna Edjean un ovacion riba pia, Edjean a invita Ministro Sra. Maduro pa interpreta “Cunucu di Seit” cu a bira un di e momentonan mas memorabel di e anochi.

Otro momento sumamente emotivo y historico tabata e homenahe cu Edjean y su orkesta a rindi na nos tata di cultura Sr. Padu Lampe, na momento cu a paga tur luz den Ser’i Noka pa asina e publico presente por a sende flash di nan telefonnan y crea un efecto di luz magnifico.

E momentonan aki y mas por wordo aprecia un bes mas durante e gran estreno di e produccion mahestuoso aki, den cadena nacional dia 23 di december pa 9.10PM, atravez di nos canalnan di television local Diario Tv, Canal 22 y Telearuba.

E motibo cu a dicidi di transmiti esaki ta pasobra cu Ser’i Noka a resulta chikito pa e gran entusiasmo y cantidad grandisimo di persona cu tabata desea di presencia e concierto “Hey… ta Pasco!”

Pa complace cu e demanda y pa stimula union familiar, Edjean y tur compania y organisacion cu a sostene e proyecto aki a dicidi cu lo comparti e grabacion cu nos comunidad riba dia 23 di december, cu varios ripiticion den e proximo dianan.

Nos ta felicita Edjean cu e exito grandi di “Hey… ta Pasco!” y tambe pa su logro di 25 aña impresionante y exitoso den e mundo di entretenimento. Nos ta spera di por sigui disfruta di un sin fin di proyecto mas.

- Advertisement -

DUNA COMENTARIO

Please enter your comment!
Please enter your name here