Home Gobierno Gobierno di Aruba a firma acuerdo cu Fundacion Gobernacion di Calidad Aruba

Gobierno di Aruba a firma acuerdo cu Fundacion Gobernacion di Calidad Aruba

33
0
SHARE
- Advertisement -

ORANJESTAD (AAN):  Diabierna 13 di december ultimo a tuma luga firmamento di un acuerdo importante entre FGCA y Gobierno di Aruba. Ta trata di financiamento di un analisis di funcionamento di e Sistema di Integridad na Aruba. Esaki ta un instrumento cu Transparency International a desaroya na 2011.

National Integrity System Assessment

E ‘National Integrity System Assessment (NIS-A) ta un analisis extenso pa midi e efectividad di e sectornan concerni di pais pa combati corupcion como elemento di mal gobernacion. Ta investiga e riesgonan di corupcion tanto dentro di e propio ‘pilarnan importante’ como den nan contribucion pa combati corupcion en general den comunidad. Ta trata di e siguiente pilarnan:

E NIS-A ta analisa tanto e cuadro/funcshon formal di cada pilar y con e ta funciona den practica. E analisis pues ta trece na cla discrepancia cu tin entre e ‘intencion formal’ y e realidad pa clarifica na unda tin espacio pa mehoracion.

Mas tanto ta haci uzo di e instrumento di entrevista, na unda ta envolvi e ‘agentenan anti-corruptivo’ den sector gubernamental, comercial, sindical, ciudadanía, prensa, etc.

Resultado di tur esaki ta publica den un rapport cu ta sirbi pa stimula e boluntad politico y e presion di grupo civil pa bin cu iniciativa pa reforma relevante. Reforsando e Sistema di Integridad Nacional ta promove bon gobernacion y consecuentemente ta contribui na un sociedad mas husto.

Ehecucion

E analisis lo cuminsa for di principio di 2020 bou di guia di mr. dr. W. Slingerland, cu desde 2009 ta docente riba tereno di derecho internacional y Europeo, ademas di etica y integridad na SAXION University of Applied Sciences, Academy of Governance, Law & Urban Development.

Na 2018 el a ricibi un doctorado a base di su investigacion di ‘corupcion den red social’. Sra. Slingerland a ricibi training special di Transparency International pa lidera e NIS-A na Hulanda na 2012. Como tal e tin amplio experencia.

Realisacion

E proyecto di NIS-A ta uno costoso. Pesey tambe FGCA a busca financiamento di varios partner pa realisa e proyecto aki. Gobierno ta asumi mitar di e gastonan mientras cu aporte di parti di Aruba Bank, Caribbean Mercantile Bank, Banco Central y VNO a percura pa e otro mitar.

Arubaanse Investeringsbank lo supervisa administracion di e fondonan pa garantisa su bon uzo. Pa medio di esaki FGCA kier extende un gradicimento special pa tur e instancianan aki y gobierno di Aruba pa nan tremendo colaboracion!

Ideal

Mescos cu ta e caso cu e Ley pa financiamento di partido politico y Ombudsman, den Reino Hulandes Aruba ta e unico pais cu no a ehecuta un NIS-A. FGCA ta spera cu tur esakinan lo keda realisa durante aña 2020. Esey lo nifica un adelanto importante riba caminda pa bon gobernacion. Esaki sin mas lo cumbini henter comunidad di Aruba!

- Advertisement -

DUNA COMENTARIO

Please enter your comment!
Please enter your name here