Home Economia Analisis di Citigroup di Latinoamerica riba e perspectivanan economico mundial 2020

Analisis di Citigroup di Latinoamerica riba e perspectivanan economico mundial 2020

30
0
SHARE
- Advertisement -

ORANJESTAD (AAN) – E ultimo lunanan di 2019, varios Economista internacional, tanto di Merca y Europa como di e region di America Latina y Caribe, a emiti diferente analisis referente na e vision cu nan tin riba e desaroyo economico mundial na 2020.

Nan perspectivanan ta hopi varia, algun di nan hopi alentador, otronan bastante desalentador y demasiado pesimista.

E economista Ernesto Revilla, Hefe pa America Latina di Citigroup (Citi) a divulga su perspectivanan economico mundial pa 2020, den cual e ta disipa e temor na un posible recesion na henter mundo.

Den su enfoke e ta indica cu e guera comercial entre China y Merca ta Un analisis interesante y mas tanto cu Aruba su economia ta depende hopi di e continentenan Mericano, Europeo, y America Latino.

E ta señala cu den e panorama global e preocupacionnan di mas grandi a cuminza baha, e economia global lo sigui desacelera y ta pronostica un crecemento di 2.7% pa 2020.

Segun e informe di Citi, studia e contexto macroeconomico global no a resulta facil pasobra esaki a mantene un comportacion hopi singular, no obstante e guera comercial na Merca.

E indicadornan di e economia real a mustra bon perspectiva unda e mercado laboral a crece na un tasa di mas of menos 200 mil empleo pa luna, y ta registra e tasa di desempleo di mas abao den e ultimo 50 añanan.

E unico sector na Merca cu a wordo un poco afecta ta e manufactura, pero su impacto ta marginal pasobra awendia e sector aki ta aporta solamente 11% na e PIB (Producto Interno Bruto).

E indicadornan financiero na Alemania, Inglatera, y Merca mes tabata mustra algun señal di recesion den e rendimentonan halto di e bononan na largo plazo, locual no a yega di sosode debi na e tasa abao di e banconan central den dicho paisnan.

Encuanto e comportacion di China su economia, e grupo Citi ta asegura cu esaki lo no crece mas na e mesun nivel di e decada 2000, principalmente pasobra e gobierno no tin mas e capacidad di duna estimulonan monetario debi cu su nivel halto di debe ta impedi esaki. Ta wordo pronostica un desaceleracion modera cu un crecemento di 6% pa e pais asiatico aki, en caso cu lo yega na un eventual acuerdo cu Merca.

Pa loke ta trata America Latina y Caribe, Revilla ta alerta cu tin un riesgo latente pa e region pasobra maske e “commodities” (bienes basico of productonan uza pa comercializacion) lo mantene nan prijs sin alteracion (den su mayoria) e prijs di combustible por sufri un reduccion importante asocia na su baho crecemento mundial, cu lo por traduci su mes na un bahada di e demanda y aumento halto di e oferta. Dicho relacion inverso lo por afecta e finanzanan publico di Colombia, Ecuador y Mexico y pa tal motibo e gobiernonan lo mester keda cauteloso cu e fluho di nan gastonan fiscal.

No obstante, e comun denominador den e region ta e incertidumbre y e descontento social na Chile, Bolivia, y otro paisnan di e region cual perspectivanan di crecemento a baha notablemente.

Den e caso di Colombia, e pronostico ta aumenta di un crecemento di 3.1% na 3.2%, y aunke e porcentahe no ta significativo ta e notable si, den e contexto di e region den su totalidad. Factornan manera inversion stranhero y e aumento den e consumo interno, a permiti e pais sigui crece riba otro mercadonan emergente.

E inestabilidad politico y social di Peru y Chile a crea perspectivanan abao no obstante nan tabata creciendo na un forma acelera. Pero ta spera si cu e manifestacionnan social lo disminui cu e paso di tempo.

Tocante e economianan di mas grandi di e region cu ta Brasil y Mexico nan a mantene un dinamica abao. Brasil debi na e poco inversion di sector priva, y Mexico pa e disminucion di e confianza den e tendencianan politico di Lopez Obrador.

Finalmente, Revilla ta splica cu henter e region a desacelara hopi debi na e choke social y politico cu a motiva un perspectiva negativo di futuro, y un descontento social cu tambe a wordo potencia door di e incapacidad di e gobiernonan di influi positivamente den e condicionnan di bida di e ciudadanonan y disminui e desigualdad. E insatisfaccion cu e democracia a bin ta aumento, y esaki ta un alarma cu ta aumenta e presion riba e gobiernonan.

- Advertisement -

DUNA COMENTARIO

Please enter your comment!
Please enter your name here